ប៉ាគីស្ថានបានដាក់ពង្រាយកងទ័ពចំនួន ៨.០០០នាក់ កងអនុសេនាធំយន្តហោះចម្បាំង និងប្រព័ន្ធការពារដែនអាកាសទៅកាន់ប្រទេសអារ៉ាប៊ីសាអ៊ូឌីត ក្រោមកិច្ចព្រមព្រៀងការពារទៅវិញទៅមក ដោយបង្កើនកិច្ចសហប្រតិបត្តិការយោធាជាមួយទីក្រុងរីយ៉ាដ ទោះបីជាទីក្រុងអ៊ីស្លាម៉ាបាដដើរតួជាអ្នកសម្របសម្រួលដ៏សំខាន់ នៅក្នុងសង្គ្រាមអ៊ីរ៉ង់ក៏ដោយ។

ការដាក់ពង្រាយនេះ ដែលមានទ្រង់ទ្រាយធំត្រូវបានរាយការណ៍ជាលើកដំបូង ត្រូវបានបញ្ជាក់ដោយមន្ត្រីសន្តិសុខបីរូប និងប្រភពរដ្ឋាភិបាលពីររូប ដែលទាំងអស់គ្នាបានពិពណ៌នាថា នេះគឺជាកម្លាំងដ៏រឹងមាំ និងមានសមត្ថភាពប្រយុទ្ធ ដែលមានបំណងគាំទ្រយោធារបស់អារ៉ាប៊ីសាអ៊ូឌីត ប្រសិនបើព្រះរាជាណាចក្រនេះ រងការវាយប្រហារថែមទៀតនោះ។

ការិយាល័យកិច្ចការយោធា និងការបរទេសរបស់ប៉ាគីស្ថាន និងការិយាល័យប្រព័ន្ធផ្សព្វផ្សាយរដ្ឋាភិបាលរបស់អារ៉ាប៊ីសាអ៊ូឌីត មិនបានឆ្លើយតបទៅនឹងសំណើសុំការអត្ថាធិប្បាយលើការដាក់ពង្រាយនេះទេ។

លក្ខខណ្ឌពេញលេញនៃកិច្ចព្រមព្រៀងការពារជាតិ ដែលបានចុះហត្ថលេខាកាលពីឆ្នាំមុន គឺជាសម្ងាត់ ប៉ុន្តែភាគីទាំងពីរ បាននិយាយថា កិច្ចព្រមព្រៀងនេះ តម្រូវឲ្យប៉ាគីស្ថាន និងអារ៉ាប៊ីសាអ៊ូឌីតការពារគ្នាទៅវិញទៅមក ក្នុងករណីមានការវាយប្រហារ។ នាពេលកន្លងមក រដ្ឋមន្ត្រីក្រសួងការពារជាតិលោក Khawaja Asif បានបញ្ជាក់ថា កិច្ចព្រមព្រៀងនេះដាក់អារ៉ាប៊ីសាអ៊ូឌីតនៅក្រោមឆត្រនុយក្លេអ៊ែររបស់ប៉ាគីស្ថាន៕