ប្រធានាធិបតីគុយបា លោក Miguel Diaz-Canel បាននិយាយកាលពីថ្ងៃចន្ទ (ទី១៨ ខែឧសភា ឆ្នាំ​២០២៦) ថា វិធានការ​យោធាណាមួយរបស់សហរដ្ឋអាមេរិក លើ​ប្រទេស​គុយបា នឹងនាំឲ្យ​មាន «ការបង្ហូរឈាម» ដោយ​ផលវិបាកមិនអាចគណនាបានឡើយ​ សម្រាប់ការ​ប៉ះពាល់​ដល់​សន្តិភាព និងស្ថិរភាព ក្នុងតំបន់។

លោក Diaz-Canel បានបង្ហោះសារខ្លី​មួយនៅលើបណ្ដាញ​សង្គម​ X ថា «ប្រទេស​គុយបាមិនមែនជាកន្លែង​តំណាង​ឲ្យ​​ការគំរាមកំហែងឡើយ​»។

ការ​លើក​ឡើង​នេះ​ទាំងនេះកើត​ឡើង​បន្ទាប់ពីមាន​សេចក្ដី​រាយការណ៍ពី​សារព័ត៌មាន​​ Axios ដែលបានចេញផ្សាយកាលពីថ្ងៃអាទិត្យ ដោយដកស្រង់ព័ត៌មានសម្ងាត់ ដែលបានបញ្ជាក់​ថា គុយបាទទួលបានយាន​ដ្រូន​យោធាជាង ៣០០គ្រឿង ហើយបានពិភាក្សាអំពីផែនការប្រើប្រាស់វា ដើម្បីវាយប្រហារមូលដ្ឋានកងទ័ពជើងទឹកសហរដ្ឋអាមេរិក នៅឈូងសមុទ្រ Guantanamo នាវាយោធាអាមេរិក និងទីក្រុង​ Key West រដ្ឋ Florida។ គុយបាបានឲ្យ​ដឹងថា សហរដ្ឋអាមេរិកកំពុងប្រឌិត​ករណី ដើម្បីបង្ហាញអំពីភាពត្រឹមត្រូវនៃអន្តរាគមន៍យោធាដែលអាចកើតមាន។

ដោយ​ឡែក​នៅតាមដងផ្លូវនៃទីក្រុងឡាហាវ៉ាន​វិញ​ ប្រជាជនមួយចំនួនបាននិយាយថា ពួកគេនឹងទប់ទល់នឹងការវាយប្រហារណាមួយ ទោះបីជាមានការលំបាកផ្នែកសេដ្ឋកិច្ចយ៉ាងធ្ងន់ធ្ងររបស់កោះនេះក៏ដោយ។

គួរបញ្ជាក់ថា គុយបា ដែលជាសត្រូវលទ្ធិ​កុម្មុយនី​ស្តរបស់ទីក្រុងវ៉ាស៊ីនតោនអស់ជាច្រើនជំនាន់មកហើយនោះ​ បានស្ថិតនៅក្រោមភាពតានតឹងកាន់តែខ្លាំងឡើងៗ ចាប់តាំងពីសហរដ្ឋអាមេរិកបានកាត់ផ្តាច់ការផ្គត់ផ្គង់ថាមពលរបស់ខ្លួន បន្ទាប់ពីចាប់ខ្លួនប្រធានាធិបតីរបស់​ប្រទេសវ៉េណេស៊ុយអេឡា ដែលជាសម្ព័ន្ធមិត្តរបស់កោះនេះ កាលពីខែមករា។ ក្នុងរយៈពេលប៉ុន្មានសប្តាហ៍ថ្មីៗនេះ ប្រេងឥន្ធនៈបានអស់ ហើយអគ្គិសនីជារឿយៗ អាចមាន​ប្រើប្រាស់​ត្រឹមតែ ១ម៉ោង ឬ ២ម៉ោងប៉ុណ្ណោះ ក្នុងមួយថ្ងៃ៕