មេដឹកនាំរុស្ស៊ី និងចិន នឹងអនុម័តសេចក្តីប្រកាស ស្តីពីការបង្កើតពិភពលោកពហុប៉ូល ក្នុងអំឡុងពេល​មាន​ដំណើរទស្សនកិច្ចរបស់ប្រធានាធិបតីរុស្ស៊ី លោក Vladimir Putin ទៅកាន់​ទីក្រុងប៉េកាំង។ នេះបើយោងតាមការ​ឲ្យ​ដឹង​ពី​ជំនួយការរបស់លោកទទួលបន្ទុកកិច្ចការអន្តរជាតិ គឺលោក Yury Ushakov កាលពីថ្ងៃចន្ទ (១៨ ខែឧសភា ឆ្នាំ២០២៦)។

អំឡុង​ពេល​ថ្លែងនៅក្នុងសន្និសីទសារព័ត៌មានមួយ ក្នុង​ទីក្រុងមូស្គូ លោក Ushakov បាននិយាយថា លោក Putin នឹងទៅ​ដល់ទីក្រុងប៉េកាំង នា​ល្ងាចថ្ងៃអង្គារនេះ​ សម្រាប់ដំណើរទស្សនកិច្ចផ្លូវ​រដ្ឋ​ ដែលមានកិច្ចពិភាក្សាយ៉ាងទូលំទូលាយជាមួយប្រធានាធិបតីចិន លោក ស៊ី ជីនពីង (Xi Jinping)។

លោកបានឲ្យ​ដឹង​ទៀត​ថា៖ «ដំណើរទស្សនកិច្ចនេះនឹងចាប់ផ្តើមជាមួយនឹងពិធីស្វាគមន៍ជាផ្លូវការ នៅទីលានធានអានមិន (Tiananmen Square) ហើយ​បន្ទាប់មក មាន​កិច្ចពិភាក្សា រវាងលោក Putin និងលោក Xi ទាំងទម្រង់តូចចង្អៀត និងទូលំទូលាយ នៅមហា​សាលប្រជាជនចិន​»។

លោក Ushakov បានបន្ថែម​ថា មេដឹកនាំទាំង​២ ត្រូវបានគេរំពឹងថា នឹងពិភាក្សាអំពីបញ្ហា «សំខាន់ៗ និងរសើប» លើរបៀបវារៈទ្វេភាគី ខណៈដែលកិច្ចពិភាក្សាទម្រង់ទូលំទូលាយ​ នឹងរួមបញ្ចូលគណៈប្រតិភូរុស្ស៊ីចំនួន ៣៩រូប។

ក្នុង​ជំនួប​នោះ លោក Putin និងលោក ស៊ី ក៏ត្រូវបានគេរំពឹងថា នឹងអនុម័តសេចក្តីប្រកាសរួម ស្តីពីការបង្កើតសណ្តាប់ធ្នាប់ពិភពលោកពហុប៉ូល និងទំនាក់ទំនងអន្តរជាតិប្រភេទថ្មី ក៏ដូចជាសេចក្តីថ្លែងការណ៍រួមដាច់ដោយឡែកមួយ ស្តីពីការពង្រឹងភាពជាដៃគូគ្រប់ជ្រុង​ជ្រោយ​ និងកិច្ចសហប្រតិបត្តិការជាយុទ្ធសាស្ត្របន្ថែមទៀត។

ហើយ​ជាមួយ​គ្នា​នេះ លោក Ushakov បានសង្កត់ធ្ងន់ថា មិនមាន «ពាក់​ព័ន្ធ​គ្នា​» ឡើយ​ រវាងដំណើរទស្សនកិច្ចរបស់លោក Putin និងដំណើរទស្សនកិច្ចកាលពីសប្តាហ៍មុនទៅកាន់ប្រទេសចិនដោយប្រធានាធិបតីអាមេរិក លោក Donald Trump ដោយលោកបានបញ្ជាក់​ថា កាលបរិច្ឆេទ សម្រាប់ការ​ធ្វើ​ដំណើរ​របស់ប្រធានាធិបតីរុស្ស៊ី ត្រូវបានព្រមព្រៀងគ្នាភ្លាមៗ បន្ទាប់ពីលោក Putin និងលោក Xi បានធ្វើសន្និសីទវីដេអូកាល​ពី​ថ្ងៃទី៤ ខែកុម្ភៈ៕