អាជ្ញាធរបានឲ្យ​ដឹង​ថា ភ្លៀងធ្លាក់ខ្លាំង នៅទូទាំងភាគខាងត្បូង និងភាគ​កណ្តាលនៃ​ប្រទេសចិន បានបង្កឲ្យ​មានទឹកជំនន់គ្រប់​ទិស​ទី នៅថ្ងៃអង្គារ (ទី១៩ ខែឧសភា ឆ្នាំ២០២៦) នេះ​ ដោយបានបណ្ដាល​ឲ្យ​មនុស្សយ៉ាងហោចណាស់ ១០នាក់ស្លាប់​ ហើយ​សាលារៀន និងអាជីវកម្មត្រូវបាន​បិទ​ ខណៈ​រំខានដល់ការដឹកជញ្ជូន និងការផ្គត់ផ្គង់ថាមពល។

ទីភ្នាក់ងារអាកាសធាតុរបស់ប្រទេសចិន បានឲ្យ​ដឹង​ថា តំបន់ជាច្រើន នៅក្នុងខេត្ត Jiangxi, Anhui, Hunan, Hubei, Guizhou, Guangxi, Guangdong និង Hainan ប្រឈមនឹងហានិភ័យខ្ពស់​នៃ​ការមាន​គ្រោះមហន្តរាយទាក់ទងនឹងទឹក​ភ្លៀង ក្នុង​នោះ​រួមមាន​ទាំងបំណាក់​ដី ទឹកជំនន់យ៉ាង​គំហុក​ភ្លាមៗ និងទឹក​ជន់លិចទីក្រុង​​យ៉ាងធ្ងន់ធ្ងរ និង​ទឹកប្រមូល​ផ្ដុំ​នៅ​តំបន់​ទំនាបមិន​ងាយ​ស្រក​។

អាជ្ញាធរបានឲ្យ​ដឹង​ថា ការឆ្លើយតបជាបន្ទាន់ កំពុង​ចាប់​ផ្ដើម​នៅក្នុងតំបន់ដែលរងផលប៉ះពាល់ជាច្រើន។ យោងតាមរូបភាពដែលបានបង្ហោះនៅលើវេទិកាវីដេអូចិន Douyin បានបង្ហាញ​ឲ្យ​ឃើញ​ប្រជាជនជាច្រើនដើរលុយ​ទុក​លិចជង្គង់​នៅក្នុងទីក្រុង Jingzhou ដែលជាទីក្រុងមួយ នៅភាគកណ្តាលខេត្ត Hubei។ រថយន្តជាច្រើន​គ្រឿង​ ស្ទើរតែលិចទឹកទាំងស្រុងនៅលើផ្លូវដែលហ៊ុព័ទ្ធដោយអគារលំនៅឋាន​ និងពាណិជ្ជកម្ម។

ទូរទស្សន៍រដ្ឋ CCTV បាន​រាយការណ៍នៅ​ថ្ងៃអង្គារនេះ​ថា យ៉ាងហោចណាស់មានមនុស្ស ៦នាក់ បានបាត់បង់ជិវិត​ បន្ទាប់ពីរថយន្តភីកអាប់ ១គ្រឿងដែលដឹកអ្នកដំណើរ ១៥នាក់ បានធ្លាក់ចូលទៅក្នុងទន្លេ នៅ​តំបន់ Guangxi ភាគនិរតីនៃប្រទេសចិន ក្នុងអំឡុងពេលមានភ្លៀងធ្លាក់ខ្លាំង។ ហើយ​ទូរទស្ស​ន៍​នេះ​បាន​ឲ្យ​ដឹង​បន្ថែម​​ថា ដោយឡែក​មនុស្ស ៣នាក់បានស្លាប់ដោយសារទឹកជំនន់ភ្លាមៗ នៅក្នុងភូមិមួយកន្លែង នៅតំបន់​ទំនាប ក្នុងខេត្ត Hubei ខណៈដែលមាន​អ្នក​ស្លាប់​ម្នាក់ទៀតនៅភាគខាងត្បូងខេត្ត Hunan ។

ប្រព័ន្ធផ្សព្វផ្សាយរដ្ឋបានរាយការណ៍ថា សាលារៀន អាជីវកម្ម និងសេវាកម្មដឹកជញ្ជូន ត្រូវបានផ្អាក ហើយអាជ្ញាធរ​កំពុងជម្លៀស​ប្រជាជននៅក្នុងតំបន់មួយចំនួននៃខេត្ត Hubei និង​ Hunan៕