​

រដ្ឋមន្ត្រីក្រសួងហិរញ្ញវត្ថុអ៊ីស្រាអែល លោក Bezalel Smotrich បាននិយាយនៅ​ថ្ងៃអង្គារ (ទី១៩ ខែឧសភា ឆ្នាំ២០២៦) នេះ​ថា លោកត្រូវបានជូនដំណឹង អំពីដីកាចាប់ខ្លួនអន្តរជាតិ ដែល​ត្រូវបានចេញ​​ចំពោះ​រូប​លោកដោយតុលាការព្រហ្មទណ្ឌអន្តរជាតិ (ICC)។

ដូចដែលបានដកស្រង់ដោយសារព័ត៌មាន​ចុះផ្សាយ​ប្រចាំថ្ងៃ Yedioth Ahronoth លោក Smotrich បានប្រាប់សន្និសីទសារព័ត៌មានមួយ​ថា៖ «យប់មិញខ្ញុំត្រូវបានជូនដំណឹងថា សំណើសុំដីកាចាប់ខ្លួនអន្តរជាតិសម្ងាត់មួយ ត្រូវបានចេញ ចំពោះ​រូប​ខ្ញុំ ដោយរដ្ឋ​អាជ្ញានៃតុលាការប្រឆាំងជនជាតិ​ជ្វីហ្វនិយម​ នៅទីក្រុងឡាអេ (ប្រទេសហូឡង់)»។

លោក Smotrich បានពិពណ៌នាអំពីចំណាត់ការ​នេះថា ជាការប៉ុនប៉ង «ដើម្បីដាក់ចេញ​គោលនយោបាយ​សន្តិសុខអត្តឃាត លើពួក​យើង តាមរយៈទណ្ឌកម្ម និងដីកាចាប់ខ្លួន»។

គួរបញ្ជាក់​ថា កាលពី​ថ្ងៃអាទិត្យចុងសប្ដាហ៍​កន្លង​ទៅ​ សារព័ត៌មាន​ Haaretz ដោយសំអាង​ដល់​ប្រភពការទូតដែលបាន​និយាយ​ក្នុង​លក្ខខណ្ឌ​មិនបញ្ចេញឈ្មោះ បានរាយការណ៍​ថា រដ្ឋអាជ្ញាជាន់ខ្ពស់របស់ ICC បានស្នើសុំដីកាចាប់ខ្លួន សម្រាប់ «មន្ត្រីអ៊ីស្រាអែលមួយចំនួនដែល​មិន​ត្រូវបាន​បញ្ជាក់​ច្បាស់លាស់​»។ ប្រភពដដែលបានឲ្យ​ដឹង​បន្ថែម​ថា ដីកាចាប់ខ្លួនទាំងនេះនឹងផ្តោតលើមន្ត្រីកងទ័ពអ៊ីស្រាអែល ៣រូប​ និងអ្នកនយោបាយ ២នាក់ ដោយបន្ថែមថា ពេលវេលានៃសំណើនេះនៅមិនទាន់ដឹងនៅឡើយទេ។

សម្រាប់​លោក Smotrich លោក​ក៏បាននិយាយ​ផងដែរថា លោកនឹងចុះហត្ថលេខា លើបទបញ្ជាបណ្តេញ​ចេញ សម្រាប់ភូមិ Khan al-Ahmar ដែលជាភូមិ​សហគមន៍ Bedouin ប៉ាឡេស្ទីន នៅក្នុងតំបន់កាន់កាប់ West Bank បន្ទាប់ពីបានដឹងពីសំណើដីកាចាប់ខ្លួននេះ៕