អនុរដ្ឋមន្ត្រីការបរទេសរុស្ស៊ី លោក Sergey Ryabkov បានប្រាប់សារព័ត៌មាន​ TASS ក្នុងបទសម្ភាសន៍មួយថា ហានិភ័យជាយុទ្ធសាស្ត្រនៃការប្រឈមមុខដាក់គ្នាដោយផ្ទាល់ រវាងអង្គការ​ណាតូ (NATO) និងប្រទេស​រុស្ស៊ី កំពុងកើនឡើង ដែលអាចនឹង​មានផលវិបាកដ៏​មហន្តរាយ។

លោក Ryabkov បានគូសបញ្ជាក់ពី «ការ​កើន​ឡើង​​នៃ​​និទានកថា» ពីរដ្ឋធានីអឺរ៉ុប អំពី «ការលេច​ឡើង​នូវ​គំរាមកំហែងបង្ក​សង្គ្រាមទ្រង់ទ្រាយ​ធំ​» ជាមួយរុស្ស៊ី។ លោកបានព្រមានថា៖ «ដោយសារ​ការកើនឡើងនូវភាពតានតឹងនេះ រួមទាំងចលនាញុះញង់យ៉ាងច្បាស់ក្រឡែត​ នៅក្នុងវិស័យនុយក្លេអ៊ែរ ហានិភ័យជាយុទ្ធសាស្ត្រកំពុងកើនឡើង ក៏ដូចជាគ្រោះថ្នាក់នៃការប៉ះទង្គិចគ្នាដោយផ្ទាល់ រវាងអង្គការ​ណាតូ និងប្រទេសរបស់យើង ដោយ​ផលវិបាកដ៏​មហន្តរាយអាចកើតមានឡើង​»។

ដោយធ្វើអត្ថាធិប្បាយលើចេតនារបស់ប្រទេសហ្វាំងឡង់ ក្នុងការធ្វើជាទីតាំង​របស់​​អាវុធនុយក្លេអ៊ែរ និងផែនការរបស់បារាំង និងប៉ូឡូញ ក្នុងការធ្វើសមយុទ្ធរារាំង នៅ​សមុទ្របាល់ទិក ដោយក្លែង​ធ្វើការវាយប្រហារនុយក្លេអ៊ែរឲ្យ​ដូច​ពិត លើគោលដៅរបស់រុស្ស៊ី លោក Ryabkov បានកត់សម្គាល់ថា «រុស្ស៊ីបានបង្ហាញយ៉ាងច្បាស់នូវការរិះគន់យ៉ាងខ្លាំង ចំពោះការរៀបចំបែបនេះ ដោយបណ្ដាប្រទេស​អឺរ៉ុប»។

អ្នក​ការ​ទូត​ជាន់​ខ្ពស់​រុស្ស៊ី​រូប​នេះ​បាន​បញ្ជាក់​បន្ថែម​ថា៖ «ចំណាត់​ការ​​បែបនេះ​កំពុង​ត្រូវ​បាន​អម​ដោយ​វោហាសាស្ត្រ​អរិភាព ប្រឆាំង​រុស្ស៊ី​ ហើយ​វា​ជា​ធាតុ​មួយ​នៃ​ដំណើរការ​ទូលំទូលាយ​នៃ​ការ​ពន្លឿន​យោធា​ភាវូបនីយកម្ម​របស់​អឺរ៉ុប ដែល​ផ្តោត​លើ​ប្រទេស​នេះ​ដោយ​ផ្ទាល់»៕