មេដឹកនាំរបស់ពួកគេនិយាយថា នៅថ្ងៃអង្គារនេះ កូរ៉េខាងត្បូង និងជប៉ុន បានយល់ព្រមជំរុញកិច្ចសហប្រតិបត្តិការលើការផ្គត់ផ្គង់ឧស្ម័នធម្មជាតិរាវ(LNG) និងប្រេងឆៅ រួមទាំងការរៀបចំស្តុកទុក និងការផ្លាស់ប្តូរផលិតផលប្រេងកាតផងដែរ ។

ប្រធានាធិបតីកូរ៉េខាងត្បូងលោក Lee Jae Myung និងនាយករដ្ឋមន្រ្តីជប៉ុនលោកស្រី Sanae Takaichi និយាយបែបនេះ ក្រោយជំនួបនៅទីក្រុងកំណើត Andong របស់លោក Lee ដែលពួកគេបានពង្រឹងកិច្ចសហប្រតិបត្តិការ ដើម្បីធ្វើឲ្យស្ថិរភាពដល់ខ្សែចង្វាក់ផ្គត់ផ្គង់ថាមពល និងជំរុញកិច្ចសហប្រតិបត្តិការជាមួយប្រទេសដៃគូអាស៊ីផ្សេងទៀត ស្របពេលដែលមានការអាក់ខានការផ្គត់ផ្គង់ ដោយសារសង្រ្គាមនៅតំបន់ឈូងសមុទ្រ ធ្វើឲ្យប៉ះពាល់ដល់សេដ្ឋកិច្ចពឹងផ្អែកលើការនាំចូលរបស់ពួកគេ ។

លោកស្រី Takaichi និយាយថា ពួកគេបានដាក់ចេញផងដែរគំនិតផ្តួចផ្តើមទ្វេភាគី ផ្តោតសំខាន់លើការពង្រឹងភាពធន់នៃការផ្គត់ផ្គង់ថាមពល រួមទាំងការបង្កើនទុនបម្រុងនៅក្នុងតំបន់ឥណ្ឌូ-ប៉ាស៊ីហ្វិក និងការវាយតម្លៃសន្តិសុខថាមពលតាមរយៈវិធានការ ដូចជាការដោះដូរទៅវិញទៅមកសម្រាប់ប្រេងឆៅ ផលិតផលប្រេងកាត និងឧស្ម័នធម្មជាតិរាវ (LNG)។

មេដឹកនាំទាំង ២ បានបញ្ជាក់ឡើងវិញផងដែរពីកិច្ចសហប្រតិបត្តិការសន្តិសុខខ្លាំងក្លាជាងមុន រួមទាំងកិច្ចសហប្រតិបត្តិការត្រីភាគីជាមួយសហរដ្ឋអាមេរិក ស្របពេលដែលពួកគេប្រឈមការលំបាករួមគ្នា ទាំងបញ្ហាជាមួយកូរ៉េខាងជើង និងភាពតានតឹងក្នុងតំបន់ធំជាងមុន ៕