ក្រុម​អាជ្ញាធរបាននិយាយថា ភ្លៀងធ្លាក់ខ្លាំងបានបន្តនៅទូទាំងភាគខាងត្បូង និងកណ្តាលប្រទេសចិនកាលពី​ថ្ងៃអង្គារ១៩​​ ឧសភា ​សប្ដាហ៍នេះ​ ​ដោយចំនួនអ្នកស្លាប់​​បាន​កើនឡើងដល់ ២១​នាក់​ ក្នុងទឹកជំនន់​​​ដ៏ធ្ងន់ធ្ងរ​​ ដែលក៏បានបិទសាលារៀន និងអាជីវកម្ម ព្រមទាំងរំខានដល់ការដឹកជញ្ជូន និងការផ្គត់ផ្គង់ថាមពល ផងដែរ។

ទីភ្នាក់ងារអាកាសធាតុរបស់ប្រទេសចិនបាននិយាយថា តំបន់នានា​នៃខេត្ត Jiangxi, Anhui, Hunan, Hubei, Guizhou, Guangxi, Guangdong និង Hainan ប្រឈម​នឹងហានិភ័យខ្ពស់នៃគ្រោះមហន្តរាយទាក់ទងនឹងភ្លៀង រួមទាំងបំ​​​​ណាក់ដី ​​ទឹ​កជំនន់ដ៏គំហុក​។​

ក្រុម​​អាជ្ញាធរបាននិយាយថា ពួកគេបានបែងចែកថវិកាចំនួន ១៥០ លានយ័ន ស្មើ​ ២២,០៤ លានដុល្លារ​​ សម្រាប់ជំនួយសង្គ្រោះគ្រោះមហន្តរាយ និងបានចាប់ផ្តើមការឆ្លើយតបបន្ទាន់នៅក្នុងតំបន់ដែលរងផលប៉ះពាល់ជាច្រើន។

យោងតាមរូបភាពដែលបានបង្ហោះនៅលើវេទិកាវីដេអូចិន Douyin នៅក្នុងទីក្រុង Jingzhou ដែលជាទីក្រុងមួយនៅភាគ​កណ្តាលខេត្ត Hubei បង្ហាញ​​ពី​​ទឹក​​ជន់​​លិចជម្រៅ​ត្រឹម​​​​ជង្គង់។ រថយន្តមួយចំនួនត្រូវបានលិចទឹកស្ទើរតែទាំងស្រុងនៅលើផ្លូវដែលហ៊ុព័ទ្ធដោយអគារលំនៅឋា​ន និងពាណិជ្ជកម្ម។​

យោងតាមការចុះផ្សាយរបស់ប្រព័ន្ធផ្សព្វផ្សាយរដ្ឋ CCTV ​មនុស្ស ១០ នាក់ត្រូវបានបញ្ជាក់ថាស្លាប់ បន្ទាប់ពីរថយន្តភីកអាប់មួយគ្រឿងដែលដឹកកម្មករកសិដ្ឋាន ១៥ នាក់បានធ្លាក់ចូល​​ក្នុងទន្លេ​ពេញប្រៀបដោយទឹកជំនន់​នៅតំបន់ Guangxi ភាគនិរតីប្រទេសចិន ក្នុងពេលមានភ្លៀងធ្លាក់ខ្លាំង ៕