ព្រឹទ្ធសភាសហរដ្ឋអាមេរិក បានជំរុញសេចក្តីសម្រេចអំណាចសង្គ្រាមដែលអាចរារាំងប្រធានាធិបតី លោក Donald Trump ពីការប្រើប្រាស់កម្លាំងយោធាប្រឆាំងអ៊ីរ៉ង់ដោយគ្មានការអនុញ្ញាតពីសភា ក្នុងពេលមានផលវិបាកកាន់តែធំកើតចេញពីជម្លោះ។

ការបោះឆ្នោត លើវិធានការនីតិវិធីដើម្បីជំរុញសេចក្តីសម្រេចនេះ ត្រូវបានអនុម័តកាលពីថ្ងៃអង្គារមានសំឡេងគាំទ្រ៥០ទល់នឹង៤៧សំឡេង ដោយមានសមាជិកគណបក្សសាធារណរដ្ឋមួយក្រុមតូចបានចូលរួមជាមួយសមាជិកគណបក្សប្រជាធិបតេយ្យ ដើម្បីអនុម័តវិធានការនេះក្នុងការស្តីបន្ទោសដ៏កម្រចំពោះលោកប្រធានាធិបតី។

ការបោះឆ្នោត បានបង្ហាញថា សមាជិកគណបក្សសាធារណរដ្ឋមួយក្រុមតូច ប៉ុន្តែចំនួននេះកំពុងកើនឡើងជុំវិញការមិនពេញចិត្តចំពោះសង្គ្រាមដែលពុំបានបង្ហាញសញ្ញានៃការបញ្ចប់ ក្នុងពេលមានបទឈប់បាញ់ដ៏ផុយស្រួយ។

លោក Chuck Schumer មេដឹកនាំសំឡេងភាគតិចនៅព្រឹទ្ធសភាគណបក្សប្រជាធិបតេយ្យ បាននិយាយមុនពេលបោះឆ្នោតថា «ប្រធានាធិបតីរូបនេះដូចជាកូនក្មេង លេងជាមួយកាំភ្លើងដែលផ្ទុកគ្រាប់»។

ទោះជាយ៉ាងណា វាគ្រាន់តែជាការបោះឆ្នោតតាមនីតិវិធីប៉ុណ្ណោះ ហើយសេចក្តីសម្រេចនេះប្រឈមនឹងឧបសគ្គ ប្រសិនបើវាត្រូវចូលជាធរមាន។ សមាជិកគណបក្សសាធារណរដ្ឋបីរូបបានអវត្តមានក្នុងអំឡុងពេលបោះឆ្នោតកាលពីថ្ងៃអង្គារ ហើយសំឡេងឆ្នោតរបស់សមាជិក៣រូបនេះនឹងគ្រប់គ្រាន់ដើម្បីធ្វើឲ្យវិធានការបរាជ័យ ប្រសិនបើពួកគេនៅរក្សាជំហរក្នុងការគាំទ្រសង្គ្រាម។