ប្រធានាធិបតីរុស្ស៊ី លោក Vladimir Putin និងប្រធានាធិបតីចិន លោក Xi Jinping បានជួបគ្នានៅទីក្រុងប៉េកាំងនៅថ្ងៃពុធ​​​២០​ឧសភា​នេះ​​ ប៉ុន្មានថ្ងៃបន្ទាប់ពីប្រធានាធិបតីអាមេរិក លោក Donald Trump បានទៅទស្សនកិច្ចប្រទេសចិនសម្រាប់កិច្ចប្រជុំកំពូលជាមួយមេដឹកនាំចិនស្រប​​ពេលសង្គ្រាមអាមេរិក-អ៊ីរ៉ង់ នៅតែ​​​មិនទាន់បញ្ចប់​​​។

លោក Putin ត្រូវបានទទួលស្វាគមន៍ដោយពិធីស្វាគមន៍ជាផ្លូវការនៅខាងក្រៅសាលប្រជាជនចិន​ ជាកន្លែងដែលលោកប្រធានាធិបតី​ Xi បានស្វាគមន៍លោក មុនពេលមេដឹកនាំ​ទាំងពីរអង្គុយពិភាក្សាគ្នាទល់មុខ​គ្នា​។

ប្រធានបទដែលទំនងជានៅក្នុងរបៀបវារៈសម្រាប់កិច្ចពិភាក្សារបស់​​​​មេដឹកនាំ​ទាំងពី​​ ​រួមមាន ទំនាក់ទំនងទ្វេភាគី ពាណិជ្ជកម្ម សង្គ្រាមអាមេរិក-អ៊ីរ៉ង់ កិច្ចសហប្រតិបត្តិការថាមពល និងជម្លោះអ៊ុយក្រែន។

លោក Putin ​ត្រូវបានអមដំណើរដោយគណៈប្រតិភូមួយក្រុម​ រួមមានឧបនាយករដ្ឋមន្ត្រីចំនួនប្រាំរូប រដ្ឋមន្ត្រីចំនួនប្រាំបីរូប និងនាយកប្រតិបត្តិធុរកិច្ច​មួយចំនួនទៀត​។

មេដឹកនាំទាំងពីរក៏ត្រូវបានគេរំពឹងថានឹងចុះហត្ថលេខាលើសេចក្តីថ្លែងការណ៍រួមមួយ បន្ទាប់ពីកិច្ចពិភាក្សា និងកិច្ចព្រមព្រៀងផ្សេងទៀត​ផងដែរ​។

មេដឹកនាំ​កំពូលរុស្ស៊ី​រូបនេះ​ នឹងជួបជាមួយនាយករដ្ឋមន្ត្រីចិន លោក Li Qiang នៅពេលបន្ទាប់​ ដើម្បីពិភាក្សាអំពីកិច្ចសហប្រតិបត្តិការពាណិជ្ជកម្ម និងសេដ្ឋកិច្ច៕