ប្រធានាធិបតីចិន លោក Xi Jinping នៅ​ថ្ងៃពុធ​​ ២០​ឧសភា ​សប្ដាហ៍​នេះ​ ​បានអំពាវនាវឱ្យមានកិច្ចសហប្រតិបត្តិការ «យុទ្ធសាស្ត្ររយៈពេលវែង» ជាមួយរុស្ស៊ី ដើម្បីជួយកសាងប្រព័ន្ធគ្រប់គ្រងសកលប្រកបដោយ​ «យុត្តិធម៌ និងសមធម៌ជាងមុន» ក្នុងអំឡុងពេលជួបជាមួយប្រធានាធិបតីរុស្ស៊ី លោក Vladimir Putin នៅទីក្រុងប៉េកាំង។​​​​

យោងតាមទីភ្នាក់ងារសារព័ត៌មានរដ្ឋស៊ីនហួ ​ក្នុង​​សុន្ទរកថា​​បើក​​កិច្ចប្រជុំ​របស់លោក​​​នៅ​សាលប្រជាជាន​​​លោក​ Xi ​​បាន​​ថ្លែងថា​ ស្ថាន​​ភាព​​​អន្តរជាតិ​នាពេល​បច្ចុប្បន្ន​​​មានភាព​ស្មុគស្មាញ​ ​និង​ពោពេញដោយ​អស្ថិរភាព​​​ ទន្ទឹម​នឹង​​អនុត្តរភាពឯកតោភាគី​​កើនឡើង​ ​​ប៉ុន្តែ​​សន្តិភា​ព​​​​ ការអភិវ​ឌ្ឍន និងកិច្ចសហប្រតិបត្តិការ​នៅតែ​ជា​សេចក្ដីប្រាថ្នារបស់​​​សកលលោក​។​

​លោក Xi ក៏បានអំពាវនាវឱ្យមានការសម្របសម្រួលយុទ្ធសាស្ត្រទូលំទូលាយរវាងចិន និងរុស្ស៊ី ដែលមានគុណភាពខ្ពស់ជាងមុន ដើម្បីជំរុញការអភិវឌ្ឍប្រទេសទាំងពីរ​ផដែរ​។​​ ​

លោកបាននិយាយថា ទំនាក់ទំនងចិន-រុស្ស៊ី បានពង្រឹងជាលំដាប់ តាមរយៈការកើនឡើងនៃទំនុកចិត្តនយោបាយ និងកិច្ចសហប្រតិបត្តិការយុទ្ធសាស្ត្រ ការពង្រីកទំនាក់ទំនងនៅទូទាំងវិស័យផ្សេងៗ និងកិច្ចខិតខំប្រឹងប្រែងរួមគ្នា ដើម្បីរក្សាភាពស្មើភាពគ្នា​ និងយុត្តិធម៌អន្តរជាតិ។​

លោក Putin បានចាប់ផ្តើមដំណើរទស្សនកិច្ចរយៈពេលពីរថ្ងៃទៅកាន់ប្រទេសចិនកាលពីថ្ងៃអង្គារ ប៉ុន្មានថ្ងៃបន្ទាប់ពីប្រធានាធិបតីអាមេរិក លោក Donald Trump បានបញ្ចប់ដំណើរទស្សនកិច្ចរយៈពេលបីថ្ងៃ ក្នុងអំឡុងពេលដែលលោកបានធ្វើកិច្ចចរចាកំពូលជាមួយលោក Xi ៕