ស្ថានឯកអគ្គ​រាជ​ទូតកម្ពុជា​ប្រចាំសាធារណរដ្ឋកូរ៉េ​នៅថ្ងៃទី២០ឧសភានេះ​​បានអះអាងថា ​ផ្លែ​ស្វាយ​ដែល​មាន​​ម៉ាក​​យីហោ Romdoul (រំដួល) ដែល​កំពុង​ដា​ក់​លក់​នៅលើទីផ្សារកូរ៉េ គឺ​ពិត​ជា​មាន​ប្រភព​​ដើម​មក​ពី​កម្ពុជា ​​១០០% ​និងត្រូវបាន​នាំចូល ​និង​ចែក​ចាយ​ដោយក្រុមហ៊ុន ​Hyundai Agro (Cambodia)​ Co., Ltd. ​ដែលបានបោះ​ទុនវិនិ​យោគ​នៅ​កម្ពុជា។​

ការ​អះអាង​នេះធ្វើឡើង​​បន្ទាប់ពី​មានការបង្ហោះ​សារ​​​ជាអក្សរ និងជាវីដេអូ ដោយ​បាន​ជជែក​វែក​ញែក​ជា​ហូរ​ហែ ពាក់ព័ន្ធនឹងប្រភព​របស់ផ្លែស្វាយ​ដែលមានម៉ាកយីហោ Romdoul និង​ការ​ប្រើ​ប្រាស់​ស្លាក​សញ្ញា​បញ្ជាក់​ប្រភពដើម​ថាជាទំនិញរបស់​កម្ពុជា​ នៅលើផលិតផលថៃ។

​ពាក់ព័ន្ធនឹងករណីប្រើប្រាស់​ស្លាកសញ្ញាបញ្ជាក់ថាជា​ផលិតផល​របស់កម្ពុជា នៅ​លើផ្លែ​ស្វាយ​របស់​ថៃ​ ស្ថានឯកអគ្គរាជទូត បានចាត់អនុព័ន្ធពាណិជ្ជកម្មអមស្ថាន​ឯកអគ្គរាជទូត ដើម្បីស្រាវជ្រាវ និង​បាន​ទៅ​ដល់​ទីតាំង​ម៉ាត ដែលបានដាក់លក់ផលិតផល​ផ្លែស្វាយ​ខាងលើ។ ​ជាលទ្ធផល ម្ចាស់ម៉ាត​បាន​ទទួល​ស្គាល់​ថា កន្លងមក ពិតជាមានការច្រលំបិតស្លាក​សញ្ញាថា​ជាផលិតផលរបស់កម្ពុជា នៅ​លើ​ផ្លែ​ស្វាយរ​បស់​ថៃពិ​តប្រាកដមែន ប៉ុន្តែត្រូវបានកែតម្រូវរួចរាល់ហើយ។ ​អនុព័ន្ធ​ពាណិជ្ជកម្មអមស្ថានទូត ក៏បានណែនាំ និងដាស់តឿនដល់ម្ចាស់ម៉ាត ឱ្យមាន​ការ​ប្រុង​ប្រយ័ត្ន​ និងជៀសវាងការក្លែងបន្លំប្រភពដើមថា ជាផលិតផលរបស់កម្ពុជា​ ដែលអាចឈាន​ដល់​ការ​ចាត់​វិធានការតាមផ្លូវច្បាប់។

​ស្ថានឯកអគ្គរាជទូតកម្ពុជាប្រចាំប្រទេសកូរ៉េ អំពាវនាវដល់អ្នកលក់ និងអ្នកចែកចាយទំនិញនានា សូម​ជៀស​វាងការក្លែងបន្លំប្រភពដើមនៃទំនិញ ជាពិសេសការបន្លំថាជាផលិតផលរបស់កម្ពុជា ដែល​អាច​ប្រឈម​នឹងការទទួលខុសត្រូវតាមផ្លូវច្បាប់ជាធរមាន។ ក្នុងករណីបងប្អូនមានមន្ទិលសង្ស័យ ឬជួបប្រទះ​ការក្លែងបន្លំប្រភពដើមនៃទំនិញ​ថាជាផលិតផល​របស់កម្ពុជា បងប្អូនអាចរាយការណ៍មកស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ តាមរយៈ​ហ្វេសប៊ុកផ្លូវការបស់​ស្ថានទូត ឬលេខទូរស័ព្ទ ០១០ ៧៥៥៨ ៨៦៦៥ ដោយភ្ជាប់​រូបភាព​អាសយដ្ឋានហាងលក់ទំនិញ និងលេខទូរស័ព្ទហាងលក់​ទំនិញ ដើម្បីស្ថានឯកអគ្គរាជ​ទូត​មានវិធានការបន្ត។

ពាក់ព័ន្ធករណីនេះ ក្រសួងពាណិជ្ជកម្មបាន​បញ្ជាក់​ជូនសាធារណជន​ថា ផ្អែក​តាម​ប្រព័ន្ធ​​ស្វ័​យ​ប្រវត្តិ​កម្ម វិញ្ញាបនបត្របញ្ជាក់ប្រភពដើមទំនិញ (CO Automation) របស់​ក្រសួង​ពាណិជ្ជក​ម្ម ​បាន​​ពិនិត្យឃើញថា ក្រុមហ៊ុន Hyundai Agro (Cambodia) Co., Ltd. បានធ្វើការ​វិនិយោគ​ដើម្បី​ធ្វើ​ការ​នាំ​ចេញស្វាយពីកម្ពុជាតាំងពីឆ្នាំ២០១៧ និងបានធ្វើការ​សុំ​វិញ្ញាបន​បត្រ​បញ្ជាក់​​ប្រភព​ដើម​ទំនិញ នៅក្រសួងពាណិជ្ជកម្ម សម្រាប់ការនាំចេញ​ស្វាយ​ទៅ​កាន់​ប្រទេស​កូរ៉េ​ចំនួន ១ ៨៣១,៩៦តោន៕