ទំនាក់ទំនងរវាងចិន និងរុស្ស៊ី មានភាពខុសគ្នាខ្លាំងពីទំនាក់ទំនងរវាងចិន និងសហរដ្ឋអាមេរិក។

លោកPutin បានធ្វើទស្សនកិច្ចដោយផ្ទាល់ទៅកាន់ប្រទេសចិនចំនួន ២៥ លើក ហើយលោកបានជួបលោកXi ជាង ៤០ លើករួមទាំងនៅក្រៅប្រទេស។ ដូច្នេះដំណើរទស្សនកិច្ច ពិតជានឹងលើកឡើងអំពីការពង្រឹងការសម្របសម្រួល និងកិច្ចសហប្រតិបត្តិការដែលមានស្រាប់។

ភាគីទាំងពីរ ត្រូវបានគេរំពឹងថានឹងធ្វើបច្ចុប្បន្នភាពជាមួយគ្នាទៅវិញទៅមកលើការវិវឌ្ឍនៅតំបន់មជ្ឈិមបូព៌ា និងអ៊ុយក្រែន ហើយលោកXi ទំនងជានឹងថ្លែងទៅកាន់លោកPutin អំពីអ្វីដែលត្រូវបានពិភាក្សាជាមួយលោកTrump កាលពីសប្តាហ៍មុន។ លោក Putin ត្រូវបានអមដំណើរដោយគណៈប្រតិភូពាណិជ្ជកម្ម និងមេដឹកនាំរដ្ឋាភិបាល ហើយវិមានក្រឹមឡាំងបាននិយាយថា មេដឹកនាំទាំងពីរនឹងចុះហត្ថលេខាលើកិច្ចព្រមព្រៀងប្រហែល ៤០ ឯកសារដែលគ្របដណ្តប់លើវិស័យជាច្រើនរួមមានទាំងសេដ្ឋកិច្ច ទេសចរណ៍ និងការអប់រំ។

សម្រាប់លោក Putin ប្រធានបទសំខាន់នៃកិច្ចពិភាក្សាគឺសន្តិសុខថាមពល ហើយវាទំនងជា លោកនឹងលើកឡើងពីបំពង់បង្ហូរឧស្ម័ន Power of Siberia 2 ដែលតភ្ជាប់ប្រទេសទាំងពីរ។

ចាប់តាំងពីសង្គ្រាមនៅអ៊ុយក្រែនមក ការនាំចេញឧស្ម័នរបស់រុស្ស៊ីទៅកាន់អឺរ៉ុបបានថយចុះខណៈទីក្រុងមូស្គូ កំពុងត្រូវការប្រាក់ចំណូលយ៉ាងខ្លាំង។