ស្ថាប័នស្ថិតិ Eurostat នៅ​ថ្ងៃពុធ (ទី២០ ខែឧសភា ឆ្នាំ២០២៦) នេះ បាន​ឲ្យ​ដឹង​ថា អត្រាអតិផរណាប្រចាំឆ្នាំ មានកម្រិត ៣ភាគរយ​ នៅក្នុងតំបន់ចាយ​ប្រាក់អឺរ៉ូ ក្នុងខែមេសា ដែលជាកម្រិតខ្ពស់បំផុតចាប់តាំងពីខែកញ្ញា ឆ្នាំ២០២៣ មក។

Eurostat បានបញ្ជាក់​ថា អត្រានេះ បានកើនឡើងពីចំនួន ២,៦ភាគរយ ក្នុងខែមីនា ដោយបន្ថែមថា អត្រាអតិផរណាក៏បានកើនឡើងផង​ដែរ​ពី ២,៨ភាគរយ​ ទៅ​ ៣,២ភាគរយ​ នៅសហភាពអឺរ៉ុប (EU) ធៀប​នឹង​រយៈពេលដូចគ្នា។

តម្លៃថាមពលបាន​ហក់​ឡើងខ្ពស់បំផុត នៅក្នុងខែមេសា ដោយកើនឡើង ១០,៨ភាគរយ ធៀប​នឹង​ឆ្នាំ​មុន​។ បើធៀបទៅនឹងខែមីនា ឆ្នាំ២០២៦ នេះ​ អតិផរណាប្រចាំឆ្នាំ បានធ្លាក់ចុះនៅក្នុងរដ្ឋសមាជិកចំនួន ៥ នៅតែមានស្ថិរភាព នៅក្នុងប្រទេសមួយ និងបានកើនឡើងនៅក្នុងប្រទេសចំនួន ២១។

 អត្រាប្រចាំឆ្នាំទាបបំផុត មាន​​នៅក្នុងប្រទេសស៊ុយអែត (០,៥%) ដាណឺម៉ាក (១,២%) និងសាធារណរដ្ឋ​ឆេក (២,១%)។ អត្រាប្រចាំឆ្នាំខ្ពស់បំផុត មាន​នៅក្នុងប្រទេសរ៉ូម៉ានី (៩,៥%) ប៊ុលហ្គារី (៦,០%) និងក្រូអាត (៥,៤%)៕