អ៊ីតាលីនឹងកោះហៅឯកអគ្គរដ្ឋទូតអ៊ីស្រាអែល ជុំវិញការប្រព្រឹត្តចំពោះសកម្មជនដែលពាក់ព័ន្ធនឹងកងនាវាជំនួយទៅកាន់តំបន់​ហ្កា​ហ្សា ដែលនាយករដ្ឋមន្ត្រី លោកស្រី Giorgia Meloni និងរដ្ឋមន្ត្រីការបរទេស លោក Antonio Tajani បានពិពណ៌នានៅ​ថ្ងៃពុធ (ទី២០ ខែឧសភា ឆ្នាំ២០២៦) នេះ​ថា «មិនអាចទទួលយកបាន»។

ថ្នាក់​ដឹកនាំ​ទាំង២ បានលើក​ឡើង​នៅក្នុងសេចក្តីថ្លែងការណ៍រួមមួយថា៖ «រូបភាពរបស់រដ្ឋមន្ត្រីអ៊ីស្រាអែល​លោក Ben Gvir គឺមិនអាចទទួលយកបានទេ។ វាមិនអាចទទួលយកបានទេដែលអ្នកតវ៉ាទាំងនេះ រួមទាំងពលរដ្ឋអ៊ីតាលីជាច្រើនរូបផង​ដែរ​​ ត្រូវបានប្រព្រឹត្តដាក់​បែបនេះ ដែលជា​ការ​រំលោភលើសេចក្តីថ្លៃថ្នូររបស់មនុស្ស»។

រដ្ឋាភិបាលអ៊ីតាលីបានឲ្យ​ដឹង​ទៀត​ថា ខ្លួនកំពុងចាត់វិធានការភ្លាមៗ នៅកម្រិតស្ថាប័នខ្ពស់បំផុត ដើម្បីធានាឲ្យ​មា​ន​ការដោះលែងពលរដ្ឋអ៊ីតាលីដែលពាក់ព័ន្ធនឹងឧប្បត្តិហេតុនេះ។ ទីក្រុងរ៉ូមក៏បានទាមទារផង​ដែរ​ឲ្យ​មានការសូម​អភ័យ​ទោស ចំពោះការប្រព្រឹត្តលើ​សកម្មជនទាំង​នោះ​ និងអ្វីដែលខ្លួនពិពណ៌នាថា ជាការមិនអើពើ ចំពោះសំណើជាក់លាក់របស់ខ្លួន។

សេចក្តីថ្លែងការណ៍បានបន្ថែមថា៖ «ដោយសារហេតុផលទាំងនេះ ក្រសួងការបរទេស និងសហប្រតិបត្តិការអន្តរជាតិ នឹងកោះអញ្ជើញ​ឯកអគ្គរដ្ឋទូតអ៊ីស្រាអែលភ្លាមៗ ដើម្បីស្នើសុំការបំភ្លឺជាផ្លូវការ អំពីអ្វីដែលបានកើតឡើង»។

គួរ​បញ្ជាក់ថា កងនាវាផ្ដល់​ជំនួយ​មនុស្សធម៌ Global Sumud Flotilla នៅ​មុននេះ​បានឲ្យ​ដឹង​ថា នាវាទាំង ៥០​គ្រឿង នៅក្នុងក្បួននាវា​ជំនួយរបស់ខ្លួន ត្រូវបានឃាត់ទុក​ដោយអ៊ីស្រាអែល។ នាវា​ទាំងអស់ បានដឹកមនុស្សចំនួន ៤២៨នាក់ មកពី ៤៤ប្រទេស ដោយចេញដំណើរពីតំបន់​ Marmaris របស់ទួរគី ជា​ការប៉ុនប៉ងថ្មី ដើម្បីទម្លាយ​ការបិទផ្លូវដោយ​ខុសច្បាប់របស់អ៊ីស្រាអែល ដែលបានដាក់លើតំបន់ហ្កាហ្សា ចាប់តាំងពីឆ្នាំ២០០៧ មក​។ នេះមិនមែនជាឧប្បត្តិហេតុដំបូងដែលពាក់ព័ន្ធនឹងកងនាវានេះ​នោះទេ៕