ប្រទេសអារ៉ាប់រួម កាលពីថ្ងៃពុធ ទី២០ ខែឧសភា បានទាមទារឱ្យអ៊ីរ៉ាក់ទប់ស្កាត់ជាបន្ទាន់ការវាយប្រហារបន្ថែមទៀតពីទឹកដីរបស់ខ្លួន បន្ទាប់ពីការចោទប្រកាន់របស់ប្រទេសអារ៉ាប់រួមថា យានដ្រូនដែលកំណត់គោលដៅលើរោងចក្រនុយក្លេអ៊ែរ ត្រូវបានបាញ់ចេញពីប្រទេសអ៊ីរ៉ាក់។

ក្រសួងការបរទេស នៅក្នុងសេចក្តីថ្លែងការណ៍បានអំពាវនាវឱ្យ «អ៊ីរ៉ាក់ ទប់ស្កាត់សកម្មភាពអរិភាពទាំងអស់ ដែលមានប្រភពចេញមកពីទឹកដីរបស់ខ្លួនជាបន្ទាន់ និងគ្មានលក្ខខណ្ឌ» ដោយនិយាយថាមានភាពចាំបាច់ក្នុងការដោះស្រាយការគំរាមកំហែងទាំងនោះឱ្យបានឆាប់រហ័ស ភ្លាមៗ និងដោយការទទួលខុសត្រូវ។

កាលពីថ្ងៃអាទិត្យ ការវាយប្រហារដោយយានដ្រូនដែលមិនត្រូវបានបញ្ជាក់ បានវាយប្រហារម៉ាស៊ីនភ្លើងនៅជិតរោងចក្រថាមពលនុយក្លេអ៊ែរដែលមានតែមួយគត់នៅពិភពអារ៉ាប់ ក្នុងតំបន់ Barakah ទីក្រុង Abu Dhabi បង្កឱ្យមានអគ្គិភ័យ ប៉ុន្តែមិនបណ្តាលឱ្យមានអ្នករងរបួស ឬការលេចធ្លាយសារធាតុវិទ្យុសកម្មនោះទេ។

កាលពីខែមុន ប្រទេសឈូងសមុទ្រជាច្រើន រួមមានប្រទេសកាតា អារ៉ាប៊ីសាអ៊ូឌីត អារ៉ាប់រួម និងប្រទេសហ្ស៊កដានី បានទាមទារនៅក្នុងសេចក្តីថ្លែងការណ៍រួមថា ទីក្រុងបាកដាដ ធ្វើសកម្មភាពជាបន្ទាន់ដើម្បីបញ្ឈប់ការវាយប្រហារចេញពីទឹកដីរបស់ខ្លួនដោយក្រុមប្រដាប់អាវុធគាំទ្រអ៊ីរ៉ង់។

រួមជាមួយរដ្ឋឈូងសមុទ្រ ប្រទេសអ៊ីរ៉ាក់ត្រូវបានអូសទាញឲ្យធ្លាក់ចូលទៅក្នុងសង្គ្រាមរវាងសហរដ្ឋអាមេរិក អ៊ីស្រាអែល និងអ៊ីរ៉ង់ ដោយការវាយប្រហារម្តងហើយម្តងទៀតដាក់គោលដៅលើមូលដ្ឋានរបស់សហរដ្ឋអាមេរិក។