អ្នកនាំពាក្យចិនដីគោកកាលពីថ្ងៃពុធ​ ២០ ឧសភា សប្ដាហ៍នេះ បានរិះគន់មេដឹកនាំតៃវ៉ាន់លោក Lai Ching-te ចំពោះការអត្ថាធិប្បាយ​ចុងក្រោយរបស់លោកលើទំនាក់ទំនងឆ្លងច្រកសមុទ្រ ដោយចោទប្រកាន់លោកថាបានលើកកម្ពស់ការបំបែកខ្លួន និងបង្កើនភាពតានតឹងនៅទូទាំងច្រកសមុទ្រតៃវ៉ាន់។

មេដឹកនាំ​កោះតៃ​វ៉ាន់​ លោក​ Lai Ching-te ​បាននិយាយកាលពីថ្ងៃពុធសប្ដាហ៍នេះ​​​​​​​ថា​ ​កោះគ្រប់គ្រងដោយ​លទ្ធិប្រជាធិប​​តេយ្យ​មួយនេះ​ ​​នឹង​មិនបោះបង់ចោល​សិទ្ធិសេរី​ភាពរបស់ខ្លួនឡើយ ​​​ហើយ​មានតែ​ប្រជាជ​​​ន​​​២៣​លាននាក់​របស់ខ្លួន​ប៉ុណ្ណោះដែលអាច​សម្រេច​​ជោគវាសនា​របស់កោះនេះ​​​នាឱកាស​ខួប២​ឆ្នាំ​នៃការ​កាន់តំណែងជាមេដឹកនាំ​កោះនេះ។​

ក្នុងសេចក្តីប្រកាសព័ត៌មានមួយ លោក Chen Binhua អ្នកនាំពាក្យការិយាល័យកិច្ចកាកោះរតៃវ៉ាន់នៃក្រុមប្រឹក្សារដ្ឋចិន​​ បាននិយាយថា សុន្ទរកថារបស់លោក Lai ដែលប្រារព្ធខួបពីរឆ្នាំ​នៃការកាន់តំណែងរបស់លោក ​គឺ «ពោរពេញដោយការភូតកុហក និងការបោកប្រាស់ អរិភាព និងការប្រឈមដាក់គ្នា»។

លោក Chen បានចោទប្រកាន់លោក Lai ថាបានប្រកាន់ខ្ជាប់យ៉ាងរឹងមាំនូវជំហរផ្ដាច់​​ខ្លួនក្នុងការស្វែងរក «ឯករាជ្យភាពតៃវ៉ាន់» ខណៈ​កំពុងបំផ្លើសអ្វីដែលហៅថាការគំរាមកំហែងពីចិនដីគោក និងបង្កើនការប្រឈមដាក់គ្នានៅទូទាំងច្រកសមុទ្រ។​​​​​​​​

លោកបាននិយាយថា លោក Lai បានលេងល្បិចចាស់មួយដោយដៃ​​ម្ខាង​​​​ចាប់យ​ក​របៀបវារៈតស៊ូមតិបំបែកខ្លួន ​​និងអំពាវនាវឱ្យមានការសន្ទនា និងការផ្លាស់ប្តូរដោយមិនស្មោះត្រង់ជាមួយចិនដីគោក​ ​ហើយ​​​ដៃ​​​ម្ខាងទៀត ព្យាយាមបំភាន់មនុស្សនៅតំបន់​តៃវ៉ាន់ និងបោកបញ្ឆោតសហគមន៍អន្តរជាតិ។

ដោយបញ្ជាក់ជាថ្មីអំពីជំហររបស់ចិនដីគោកលើបញ្ហាកោះ​​តៃវ៉ាន់ លោក Chen បាននិយាយថា តៃវ៉ាន់មិនដែលជាប្រទេសមួយទេ មិនមែនជាប្រទេសមួយនៅពេលនេះទេ ហើយនឹងមិនដែលក្លាយជាប្រទេសមួយនាពេលអនាគតឡើយ។លោកបានហៅ​បញ្ហាតៃវ៉ាន់ថាជាបញ្ហាប្រវត្តិសាស្ត្រដែលបន្សល់ទុកពីសង្គ្រាមស៊ីវិលចិន ក្នុងទសវត្សរ៍ឆ្នាំ ​​១៩៤០​។

លោកថា គ្មានលទ្ធផលនៃការបោះឆ្នោតណាមួយនៅតៃវ៉ាន់អាចផ្លាស់ប្តូរការពិតដែលថាកោះ​តៃវ៉ាន់ជាផ្នែកមួយនៃប្រទេសចិន ឬកាត់ផ្តាច់ចំណងប្រវត្តិសាស្ត្រ និងផ្លូវច្បាប់ដែលភ្ជាប់ភាគីទាំងពីរនៃច្រកសមុទ្រនោះទេ៕