កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បាននិយាយថា ខ្លួនបានសម្របសម្រួលឲ្យនាវាចំនួន ២៦ គ្រឿងឆ្លងកាត់ច្រកសមុទ្រ Hormuz ក្នុងរយៈពេល ២៤ ម៉ោងកន្លងទៅនេះ ខណៈការចរចារវាងទីក្រុងវ៉ាស៊ីនតោន និងទីក្រុងតេអេរ៉ង់ លើការបន្តចរាចរណ៍ឡើងវិញតាមផ្លូវទឹកតូចចង្អៀតមួយនេះ នៅតែជាប់គាំង។

សេចក្តីថ្លែងការណ៍ដែលធ្វើឡើងដោយទីភ្នាក់ងារសារព័ត៌មាន ISNA បាននិយាយកាលពីថ្ងៃពុធថា «ការធ្វើចរាចរណ៍ឆ្លងកាត់ច្រកសមុទ្រ Hormuz កំពុងត្រូវបានអនុវត្តដោយមានការអនុញ្ញាត និងការសម្របសម្រួលជាមួយកងទ័ពជើងទឹកនៃកងឆ្មាំបដិវត្តន៍អ៊ីស្លាមអ៊ីរ៉ង់ (IRGC)»។

កាលពីថ្ងៃពុធ អាជ្ញាធរច្រកសមុទ្រនៃឈូងសមុទ្រពែក្សអ៊ីរ៉ង់ (PGSA) បានចេញផ្សាយផែនទីថ្មីនៃច្រកសមុទ្រ Hormuz នៅលើបណ្តាញ X បង្ហាញការគ្រប់គ្រងនៅតំបន់សមុទ្រដែលនាវាជាច្រើនគ្រឿងនឹងមិនអាចឆ្លងកាត់ដោយគ្មានការអនុញ្ញាតពីពួកគេ បានឡើយ។

ប្រហែលមួយភាគប្រាំនៃការនាំចេញថាមពលសកលធ្លាប់ឆ្លងកាត់ច្រកសមុទ្រនេះមុនពេលចាប់ផ្តើមសង្គ្រាមរបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ នៅថ្ងៃទី២៨ ខែកុម្ភៈ ដែលជំរុញឱ្យទីក្រុងតេអេរ៉ង់ បិទផ្លូវទឹកនេះ។

រដ្ឋបាលរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ បានឆ្លើយតបដោយដាក់ការបិទផ្លូវទឹកនៅកំពង់ផែអ៊ីរ៉ង់ ធ្វើឱ្យជាប់គាំងការនាំចេញប្រេងរបស់អ៊ីរ៉ង់ដែលជាប្រភពចំណូលដ៏សំខាន់របស់ប្រទេស។ ការប្រឈមមុខដាក់គ្នា បានធ្វើឱ្យមានភាពតានតឹងយ៉ាងខ្លាំងទៅលើទីផ្សារថាមពលសកល ព្រមទាំងបង្កើនការព្រួយបារម្ភអំពីគ្រោះមហន្តរាយមនុស្សធម៌ដែលនឹងកើតមាន។

កាលពីថ្ងៃពុធ អង្គការស្បៀងអាហារ និងកសិកម្មនៃអង្គការសហប្រជាជាតិ (FAO) បានព្រមានថា ការបិទផ្លូវទឹកនេះ អាចបង្កឱ្យមានវិបត្តិតម្លៃស្បៀងសកលធ្ងន់ធ្ងរក្នុងរយៈពេល៦ទៅ១២ខែ។