អង្គការសុខភាពពិភពលោក (WHO) និយាយថា ខ្លួន​​អាចចំណាយពេលរហូតដល់ប្រាំបួនខែ មុនពេលវ៉ាក់សាំងប្រឆាំងជំងឺ​អេបូឡា (Ebola) ជាក់លាក់នេះរួចរាល់។ 

លោកវេជ្ជបណ្ឌិត Vasee Moorthy ទីប្រឹក្សារបស់​​​ WHO បាននិយាយកាលពីថ្ងៃពុធ ​​​២០​​ឧសភា ​សប្ដាហ៍នេះ​​ថាប្រភេទ​វ៉ាក់សាំងចំនួនពីរប្រឆាំងនឹងវីរុស​ប្រភេទ Bundibugyo កំពុងត្រូវបានបង្កើតឡើង ប៉ុន្តែទាំងពីរនោះ មិនទាន់បានឆ្លងកាត់ការសាកល្បងព្យាបាលនៅឡើយទេ។

លោកវេជ្ជបណ្ឌិត Tedros Adhanom Ghebreyesus ប្រមុខ​​ WHO បាននិយាយថា មានករណីសង្ស័យថាមានជំងឺអេបូឡាចំនួន ៦០០ ករណី និងករណីសង្ស័យថាស្លាប់ដោយសារ​ជំងឺ​​នេះ​ឡើងដល់​១៣៩​នាក់ ​​​​ត្រូវបានរាយការណ៍​ទូទាំងពិភពលោក​​​​​ ប៉ុន្តែចំនួននេះត្រូវ​គេរំពឹងថានឹងកើនឡើង។​

ថ្លែងទៅកាន់ក្រុមអ្នកសារព័ត៌មាននៅទីក្រុងហ្សឺណែវ លោ​​កបាននិយាយថា ករណីឆ្លង​​ចំនួន ៥១ នាក់​ត្រូវបានបញ្ជាក់នៅក្នុងសាធារណរដ្ឋប្រជាធិបតេយ្យកុងហ្គោ ជាកន្លែងដែលករណីឆ្លង​ដំបូងត្រូវបានរាយការណ៍ និងពីរករណី​នៅក្នុងប្រទេសជិតខាងអ៊ូហ្គង់ដា។

កាលពី​ថ្ងៃអាទិត្យ WHO បានប្រកាសគ្រាអាសន្នសុខភាពសាធារណៈជាកង្វល់អន្តរជាតិ ប៉ុន្តែបាននិយាយថាជំងឺ​នេះ​ មិនមែនស្ថិតនៅកម្រិតរាតត្បាតទេ​។

លោក Tedros និយាយថា បន្ទាប់ពីកិច្ចប្រជុំកាលពីថ្ងៃអង្គារ គណៈកម្មាធិការសង្គ្រោះបន្ទាន់របស់អង្គការសុខភាពពិភពលោក​មួយនេះបានយល់ស្របថា ស្ថានភាពនេះ "មិនមែនជាគ្រា​​អាសន្ននៃជំងឺ​រាតត្បាតទេ។លោក​បាន​ពន្យល់​ថា អង្គការ​សុខភាព​ពិភពលោក វាយតម្លៃ​ហានិភ័យ​នៃ​ជំងឺ​រាតត្បាតនេះ ​ថា​ខ្ពស់​នៅ​កម្រិត​ជាតិ និង​តំបន់ និង​ទាប​នៅ​កម្រិត​សកល​។ យ៉ាងណា​ក៏ដោយ​ អង្គការ​នេះ​ កាលពីថ្ងៃអង្គារ ១៩ ខែឧសភា សប្ដាហ៍នេះ បានសម្តែងការព្រួយបារម្ភអំពី «ទំហំ និងល្បឿន» នៃការផ្ទុះឡើងជំងឺអេបូឡា ដែលបានសម្លាប់មនុស្សជាង​១០០​នាក់នៅសាធារណរដ្ឋប្រជាធិបតេយ្យកុងហ្គោ ហើយបានព្រមានថាការឆ្លងរាលដាលនេះអាចនឹងអូសបន្លាយពេលយូរ។