តម្លៃប្រេងបានងើបឡើងវិញនៅថ្ងៃព្រហស្បតិ៍ ​​២១​ ​ឧសភា ​សប្ដាហ៍នេះ បន្ទាប់ពីមានការខាតបង់ពីរថ្ងៃ ដោយសារក្តីបារម្ភពីការផ្គត់ផ្គង់ព្រោះ​តែទស្សនវិស័យមិនច្បាស់លាស់​​សម្រាប់ការបញ្ចប់សង្គ្រាមអ៊ីរ៉ង់ ។

តម្លៃ​​ប្រេងឆៅ Brent បានកើនឡើង ៨១ សេន ឬ ០,៧៧% ដល់ ១០៥,៨៣ ដុល្លារក្នុងមួយបារ៉ែល នៅម៉ោង ០០:៥៥នាទី​ម៉ោងសកល​​​​ ហើយតម្លៃ​ប្រេងឆៅ West Texas Intermediate របស់សហរដ្ឋអាមេរិក បានកើនឡើង ៩៧ សេន ឬ ០,៩៩% ដល់ ៩៩,២៣ ដុល្លារ ក្នុង​​មួយ​បារ៉ែល។ 

តម្លៃគោល​ទាំងពីរបានធ្លាក់ចុះជាង៥,៦%កាលពី​​ថ្ងៃពុធក្រោយ​​ប្រធានាធិបតីអាមេរិកDonald Trump និយាយថា ការចរចាជាមួយអ៊ីរ៉ង់កំពុងស្ថិតក្នុងដំណាក់កាលចុងក្រោយ ប៉ុន្តែលោកក៏បានគំរាម​វាយប្រហារបន្ថែមទៀតដែរ​​ ប្រសិនបើអ៊ីរ៉ង់មិនយល់ព្រមលើកិច្ចព្រមព្រៀងសន្តិភាព។​

អ៊ីរ៉ង់​បាន​ព្រមាន​ប្រឆាំង​នឹង​ការ​វាយប្រហារ​បន្ថែម​ទៀត និង​បាន​ប្រកាស​ពី​ជំហាន​នានា​ក្នុង​ការ​គ្រប់គ្រង​របស់​ខ្លួន​លើ​ផ្លូវ​ទឹក​ដ៏​សំខាន់​មួយ​នៃ​ច្រក​សមុទ្រ Hormuz ដែល​មុន​សង្គ្រាម​បាន​ដឹក​ជញ្ជូន​ប្រេង និង​ឧស្ម័ន​ធម្មជាតិ​រាវ​ស្មើ​នឹង​ប្រហែល២០​​% នៃ​ការ​ប្រើប្រាស់​ទូទាំង​ពិភពលោក។

​តម្លៃ​​ភាគហ៊ុនអាស៊ីបានកើនឡើងនៅថ្ងៃព្រហស្បតិ៍ ​២១​ឧសភា​នេះ​ ខណៈនាវាមួយចំនួនបានបន្តឆ្លងកាត់ច្រកសមុទ្រ Hormuz ខណៈលទ្ធផលដែលលើសពីការព្យាករណ៍នៅក្រុម​​ហ៊ុន​បច្ចេកវិទ្យា​ Nvidia និងការធ្វើកូដកម្មរបស់បុគ្គលិកដោយសារ​ការ​​​​ផ្អាកការងារ​​​​ នៅក្រុម​ហ៊ុន​​ Samsung Electronics បានធ្វើឱ្យភាគហ៊ុនរបស់ក្រុមហ៊ុនផលិតបន្ទះឈីបកើនឡើង។

សន្ទស្សន៍ភាគហ៊ុនអាស៊ីប៉ាស៊ីហ្វិកដ៏ធំទូលាយបំផុតរបស់ MSCI នៅខាងក្រៅប្រទេសជប៉ុនបានកើនឡើង ២,៦​% ដោយបញ្ចប់ការខាតបង់រយៈពេលបួនថ្ងៃជាប់ៗគ្នា។ ភាគ​​ហ៊ុន​​​ក្រុមហុន​ ​Kospi របស់កូរ៉េខាងត្បូង​ បានកើនឡើងជាង ៧​​% ភាគហ៊ុនតៃវ៉ាន់បានកើនឡើង​៣,៥​ %និងក្រុមហ៊ុន blue-chips របស់ចិនបានកើនឡើង១,១%។ចំណែក​ភាគហ៊ុន​​ក្រុមហ៊ុន Wall Street និង​ S&P 500 របស់​អាមេរិក​​​​បាន​កើនឡើង​​​១,១១​%​​ខណៈ​ភាគហ៊ុន​ ​​ Nasdaq Composite ​បាន​​ងើបឡើង​​​​១,៥​​​%​ ​​​​ក្រោយធ្លាក់ចុះរយៈពេល​​​៣​ថ្ងៃ​៕