ប្រធានាធិបតីសហរដ្ឋអាមេរិក លោក Donald Trump បានបញ្ជាក់ថា លោកមានឆន្ទៈក្នុងការសន្ទនាជាមួយមេដឹកនាំកោះតៃវ៉ាន់ លោក Lai Ching-te អំពីលទ្ធភាពនៃការលក់អាវុធរបស់សហរដ្ឋអាមេរិកទៅឱ្យកោះតៃវ៉ាន់។ នៅពេលត្រូវបានសួរថាតើលោកមានផែនការជួបសន្ទនាតាមទូរស័ព្ទទៅលោក Lai មុនពេលធ្វើការសម្រេចចិត្តអំពីការលក់អាវុធដែរឬយ៉ាងណា លោក Trump បាននិយាយថា «ខ្ញុំនឹងនិយាយជាមួយលោក Lai។ ខ្ញុំនឹងនិយាយទៅកាន់មនុស្សគ្រប់គ្នា»។ ទាក់ទងនឹងការដោះស្រាយបញ្ហា លោកTrump និយាយថា «យើងមានស្ថានភាពនោះយ៉ាងល្អប្រសើរនៅក្នុងដៃ»។ ក្រោយមក លោកបានពិពណ៌នាអំពីជំនួបកំពូលកាលពីសប្តាហ៍មុនជាមួយប្រធានាធិបតីចិន លោក Xi Jinping ថាជា «ជំនួបដ៏អស្ចារ្យ»។

លោក Trump បាននិយាយបន្ថែមថា «យើងនឹងធ្វើការលើបញ្ហានេះ គឺបញ្ហាកោះតៃវ៉ាន់»។ កាលពីសប្តាហ៍មុន លោក Trump បានអធិប្បាយលើលទ្ធភាពនៃការលក់អាវុធទៅឱ្យកោះតៃវ៉ាន់ បន្ទាប់ពីជំនួបកំពូលរបស់លោកជាមួយលោក Xi។ លោកនិយាយថា លោកនឹងត្រូវនិយាយជាមួយបុគ្គល «ដែលដឹកនាំកោះតៃវ៉ាន់»។ លោក Trump បានពិពណ៌នាអំពីលទ្ធភាពនៃការលក់អាវុធទៅឱ្យកោះតៃវ៉ាន់ថាជា «គន្លឹះនៃចរចាដ៏ល្អ»។ ទីភ្នាក់ងារសារព័ត៌មាន Reuters បាននិយាយថា ការសន្ទនារវាងលោក Trump និងលោក Lai នឹងជាការវិវឌ្ឍផ្នែកការទូតដ៏សំខាន់ ខណៈប្រធានាធិបតីសហរដ្ឋអាមេរិក និងមេដឹកនាំកោះតៃវ៉ាន់ មិនបានជួបពិភាក្សាគ្នាដោយផ្ទាល់ទេ ចាប់តាំងពីទីក្រុងវ៉ាស៊ីនតោន បានផ្លាស់ប្តូរការទទួលស្គាល់ផ្នែកការទូតទៅទីក្រុងប៉េកាំង ពីទីក្រុងតៃប៉ិ ក្នុងឆ្នាំ ១៩៧៩»។ នៅឆ្នាំ២០១៦ មុនពេលលោក Trump ចូលកាន់តំណែងជាលើកដំបូង លោកបានសន្ទនាតាមទូរស័ព្ទជាមួយមេដឹកនាំកោះតៃវ៉ាន់ លោកស្រី Tsai Ing-wen។ វាជាចំណាត់ការដ៏កម្រមួយរបស់ប្រធានាធិបតីជាប់ឆ្នោតសហរដ្ឋអាមេរិក ហើយវាបានជំរុញឱ្យទីក្រុងប៉េកាំងធ្វើការតវ៉ាជាមួយទីក្រុងវ៉ាស៊ីនតោន។ អ្នកសង្កេតការណ៍បច្ចុប្បន្នកំពុងមានចម្ងល់ថាតើជំហររបស់លោក Trump អាចប៉ះពាល់ដល់គោលនយោបាយលក់អាវុធជាយូរអង្វែងមករបស់សហរដ្ឋអាមេរិកទៅឱ្យកោះតៃវ៉ាន់ដែរ ឬយ៉ាងណា។