ស៊ីហ្គេម៖ ដោយសារការរីករាលដាលខ្លាំងនៃជំងឺកូវីដ-១៩ បានធ្វើឲ្យសហព័ន្ធកីឡាជាតិស្ទើរទាំងអស់ត្រូវខកខានប្រមូលផ្ដុំហ្វឹកហាត់ ជាក់ស្ដែងកីឡាទោចក្រយានដែលតម្រូវឲ្យកីឡាករហ្វឹកហាត់តាមផ្ទះ ឬការធ្វើស្វ័យហ្វឹកហាត់រៀងៗខ្លួន។ ប៉ុន្តែដោយពេលវេលាប្រកួតស៊ីហ្គេម ឆ្នាំ២០២១ នៅវៀតណាមកាន់តែកៀកខ្លាំង សហព័ន្ធបានជំរុញកីឡាករបង្កើនការហ្វឹកហាត់ទ្វេដង ដើម្បីត្រៀមចូលរួមប្រកួតព្រឹត្តិការណ៍ប្រចាំតំបន់នេះ។
លោក នូ ចំរើន អគ្គលេខាធិការសហព័ន្ធខ្មែរ កីឡាទោចក្រយានបានបញ្ជាក់ថា ការីករាលដាលនៃជំងឺកូវីដ-១៩ បច្ចុប្បន្នពិតជាប៉ះពាល់ខ្លាំង ដល់ផែនការប្រមូលផ្តុំជម្រើសជាតិ ហើយការប៉ះពាល់នេះមិនមែនតែសហព័ន្ធខ្លួននោះទេ គឺគ្រប់សហព័ន្ធកីឡាជាតិទាំងអស់ ដែលត្រៀមប្រមូលផ្តុំក៏រងផលប៉ះពាល់ដែរ ខណៈការប្រកួតស៊ីហ្គេមកាន់តែកៀក ពោលគឺនៅខែវិច្ឆិកាចុងឆ្នាំនេះ ដែលមកទល់ពេលនេះមានពេលមិនដល់ ៧ខែផងក្នុងការប្រមូលផ្តុំហ្វឹកហាត់ ។ ដោយហេតុនេះ សហព័ន្ធបានដាក់ចេញនូវផែនការហ្វឹកហាត់ជាប្រចាំថ្ងៃ ទោះបីជាការប្រមូលផ្តុំមិនទាន់មានក្នុងអំឡុងពេលវិបត្តិកូវីដ-១៩ នេះក្ដី គឺសហព័ន្ធបានធ្វើការតាមដានកីឡាករ-កីឡាការិនី ដោយដាក់កម្មវិធីកាលវិភាគហ្វឹកហាត់តាមផ្ទះ ឬទីកន្លែងសុវត្ថិភាព និងត្រួតពិនិត្យពីកម្រិតសិទ្ធផលបច្ចេកទេស ទាំងការហាត់កម្លាំងកាយ កម្លាំងស៊ុស និងភាពអំណត់របស់កីឡាករ-កីឡាការិនីម្នាក់ៗ ធៀបនឹងថេរវេលាផ្សេងៗដោយប្រើប្រាស់ម៉ាស៊ីនវាស់ស្ទុង។
លោក នូ ចំរើន បានសង្កត់ធ្ងន់ថា សហព័ន្ធបានជំរុញ និងលើកទឹកចិត្តដល់កីឡាករ-កីឡាការិនីឲ្យខិតខំហ្វឹកហាត់ទ្វេរដង ទាំងម៉ោងហ្វឹកហាត់ពេលព្រឹក និងពេលថ្ងៃ ដ្បិតសហព័ន្ធសង្កេតឃើញថា ពេលវេលាកាន់តែកៀកមែនទែនហើយ សម្រាប់ការចូលរួមស៊ីហ្គេមឆ្នាំនេះ។ ម្យ៉ាងបើសម្លឹងមើលប្រទេសជិតខាងក្នុងតំបន់វិញ គេត្រៀមបានយ៉ាងល្អ ហេតុដូចនេះកម្ពុជាយើងមិនអាចដេកដួលតាមបរិបទនៃជំងឺនេះបានឡើយ។ ទន្ទឹមជាមួយគ្នា លោកក៏បានថ្លែងអំណរគុណចំពោះប្រមុខរាជរដ្ឋាភិបាល និងថ្នាក់ដឹកនាំគ្រប់ជាន់ថ្នាក់ ដែលបានផ្តល់វ៉ាក់សាំងដល់កីឡាករកីឡាការិនី ដើម្បីបង្ការជំងឺកូវីដ-១៩ និងត្រៀមខ្លួនសម្រាប់ការហ្វឹកហាត់ និងការចូលរួមប្រកួតលក្ខណៈអន្តរជាតិនានា នាពេលខាងមុខ ពិសេសសហព័ន្ធសូមថ្លៃងអំណរ ដល់ប្រធានសហព័ន្ធឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ដែលតែងតែយកកចិត្តទុកដាក់ ដល់សុខទុក្ខកីឡាករកីឡាការិនី គ្រូបង្វឹក និងមន្ត្រីបច្ចេកទេសជាប់ជានិច្ច ក្នុងបរិបទនៃជំងឺដ៏កាចសាហាវនេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
