អង្គការស្បៀងអាហារ និងកសិកម្មបានព្រមានកាលពីថ្ងៃពុធ ​​​​២០​ ឧសភា ​សប្ដាហ៍​​នេះ​​ថា ការបិទច្រកសមុទ្រហ័រមូស (Hormuz )អាចបង្កឱ្យមានវិបត្តិតម្លៃស្បៀងអាហារពិភពលោកធ្ងន់ធ្ងរក្នុងរយៈពេលពី ៦ ទៅ ១២ ខែ លុះត្រាតែបណ្ដា​​​រដ្ឋាភិបាលធ្វើសកម្មភាពយ៉ាងឆាប់រហ័ស។​​

ទីភ្នាក់ងារ​របស់​អង្គការសហប្រជាជាតិ​ខាង​លើ​​និយាយថា​ ​ការសម្រេចចិត្តរបស់កសិករ និងរដ្ឋាភិបាលលើការប្រើប្រាស់ជី ការនាំចូល ហិរញ្ញប្បទាន និងជម្រើសដំណាំឥឡូវនេះនឹងកំណត់ថាតើតម្លៃស្បៀងអាហារនឹងកើនឡើងនៅចុងឆ្នាំនេះ ឬនៅដើមឆ្នាំ ២០២៧ ដែរឬអត់​​ ។

លោក Maximo Torero ប្រធានសេដ្ឋវិទូរបស់អង្គការស្បៀងអាហារ និងកសិកម្មអង្គការ​​សប្រជាជាតិ​ ​(FAO) បាននិយាយ​ក្នុងសេចក្ដី​​ប្រកាស​​​​​មួយដែលបានចេញផ្សាយកាលពីថ្ងៃពុធថា ​ចូរ​​ចាប់ផ្តើមគិតយ៉ាងម៉ត់ចត់អំពីរបៀបបង្កើនសមត្ថភាពស្រូបយករបស់ប្រទេសនានា របៀបបង្កើនភាពធន់របស់ពួកគេចំពោះភាពជាប់គាំងនេះ ដើម្បីឲ្យពួកលោក​ចាប់ផ្តើមកាត់បន្ថយផលប៉ះពាល់។​​

ផលប៉ះពាល់កំពុងបង្ហាញរួចហើយ។ សន្ទស្សន៍តម្លៃស្បៀងអាហាររបស់អង្គការ​​​ FAO ដែលតាមដានការប្រែប្រួលប្រចាំខែនៃតម្លៃទំនិញស្បៀងអាហារអន្តរជាតិ បានកើនឡើងសម្រាប់ខែទីបីជាប់ៗគ្នានៅក្នុងខែមេសា ដែលជំរុញដោយតម្លៃ​​​​ថាមពលខ្ពស់ និងការរំខាន​​ទាក់ទងនឹងជម្លោះមជ្ឈិមបូព៌ា។ ទីភ្នាក់ងារនេះបាននិយាយថា ការភ្ញាក់ផ្អើលនឹងលាតត្រដាងជាដំណាក់កាលៗ​ ​ដំបូង​​​​គឺ​ ថាមពល បន្ទាប់មកជី បន្ទាប់មកទៀត​ គ្រាប់ពូជ បន្ទាប់មកទិន្នផលទាប ក្រោយ​មកតម្លៃទំនិញ និងទីបំផុតអតិផរណាស្បៀងអាហារឈានដល់អ្នកទិញទំនិញ។

ប្រទេសក្រីក្រនៅអាស៊ី អាហ្វ្រិក និងអាមេរិកឡាទីន ​ ​​ជាកន្លែងដែលមនុស្សជាច្រើនកំពុងតស៊ូដើម្បីមានលទ្ធភាពទិញអាហារគ្រប់គ្រាន់ ​ ត្រូវបានប៉ះពាល់ច្រើនបំផុត ដោយសារតែពួកគេជាប្រពៃណីទិញជីអាសូតពីមជ្ឈិមបូព៌ា៕