រដ្ឋមន្ត្រីការបរទេសកាណាដា លោកស្រី Anita Anand កាលពីថ្ងៃពុធ ទី២០ ខែឧសភា បានច្រានចោលការអះអាងរបស់ទីក្រុងមូស្គូដែលថា បណ្តារដ្ឋតំបន់បាល់ទិក កំពុងបើកដែនអាកាសរបស់ខ្លួនសម្រាប់យានដ្រូនអ៊ុយក្រែនវាយប្រហារលើរុស្ស៊ី។ លោកស្រី បាននិយាយក្នុងសន្និសីទសារព័ត៌មាននៅទីក្រុង Tallinn ក្នុងអំឡុងដំណើរទស្សនកិច្ចផ្លូវការទៅកាន់ប្រទេសអេស្តូនីថា រុស្ស៊ីកំពុងសាបព្រោះព័ត៌មានមិនពិតជារៀងរាល់ថ្ងៃ ហើយការអះអាងរបស់ខ្លួនអំពីការប្រើប្រាស់ដែនអាកាសតំបន់បាល់ទិក គឺមិនពិតនោះទេ។

ប្រជាជនលីទុយអានី បានស្វែងរកទីជ្រកកោននៅក្រោមដីកាលពីថ្ងៃពុធ ហើយចរាចរណ៍ផ្លូវអាកាសនៅអាកាសយានដ្ឋាន Vilnius ត្រូវបានផ្អាកជាបណ្តោះអាសន្នបន្ទាប់ពីយានដ្រូនបានរំលោភលើដែនអាកាសរបស់ប្រទេស ជាឧប្បត្តិហេតុសន្តិសុខចុងក្រោយនៅក្នុងតំបន់បាល់ទិក។

រដ្ឋមន្ត្រីការបរទេសលីទុយអានី លោក Kestutis Budrys បាននិយាយថា ឧប្បត្តិហេតុយានដ្រូនកាលពីពេលថ្មីៗនេះនៅក្នុងប្រទេសអេស្តូនី ឡាតវី និងលីទុយអានី គឺជាលទ្ធផលផ្ទាល់នៃសង្គ្រាមឈ្លានពានរបស់រុស្ស៊ីប្រឆាំងអ៊ុយក្រែន ហើយរុស្ស៊ីកំពុងព្យាយាម បង្វែរយានដ្រូនទៅកាន់រដ្ឋបាល់ទិក និងធ្វើតាមសារឃោសនា និងការចោទប្រកាន់មិនពិត។

បណ្តាប្រទេសតំបន់បាល់ទិក ជាអ្នកគាំទ្រដ៏រឹងមាំរបស់អ៊ុយក្រែន បានស្តីបន្ទោសឧប្បត្តិហេតុយានដ្រូនទៅលើទីក្រុងមូស្គូ ដោយនិយាយថា រុស្ស៊ីបានបង្វែរយានដ្រូនអ៊ុយក្រែនចេញពីគោលដៅនៅក្នុងប្រទេសរុស្ស៊ី ប៉ុន្តែមិនបានផ្តល់ភស្តុតាងសម្រាប់ការអះអាងនេះទេ។ វិមានក្រឹមឡាំង បាននិយាយកាលពីថ្ងៃពុធថា ខ្លួនកំពុងតាមដានស្ថានការណ៍នេះ។