ប្រទេស​អ៊ីរ៉ង់ កាលពី​ថ្ងៃពុធ (ទី២០ ខែឧសភា ឆ្នាំ២០២៦) បាន​ប្រាប់​ឲ្យ​ដឹង​ថា ខ្លួនកំពុងពិនិត្យសំណើថ្មីរបស់សហរដ្ឋអាមេរិក ដើម្បីបញ្ចប់សង្គ្រាមមជ្ឈិមបូព៌ា ខណៈដែលប្រធានាធិបតីអាមេរិក លោក Donald Trump បានពិពណ៌នាអំពីដំណើរការចរចាថា ស្ថិតនៅលើ «ខ្សែបន្ទាត់​» រវាងការ​មាន​កិច្ចព្រមព្រៀង និងការវាយប្រហារថ្មី​។

អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baqaei បាននិយាយថា ទីក្រុងតេអេរ៉ង់ «បានទទួលការ​បង្ហាញ​នូវ​ទស្សនៈរបស់ភាគីអាមេរិក» ហើយកំពុងពិនិត្យមើលលក្ខខណ្ឌ​ទាំងនោះ​។ ជាមួយ​គ្នានេះ លោកក៏​បានលើក​ឡើង​ម្តងទៀត អំពីការទាមទាររបស់អ៊ីរ៉ង់ ក្នុង​ការឲ្យ​បញ្ចេញ​ទ្រព្យសម្បត្តិដែលត្រូវបាន​បង្កក និងបញ្ចប់ការដាក់​ឲ្យ​កំពង់ផែរបស់អ៊ីរ៉ង់ស្ថិត​ក្នុង​ការហ៊ុម​ព័ទ្ធដោយ​សហរដ្ឋអាមេរិក។

លោក Trump ដែលបាននិយាយនៅ​មុននេះថា ការចរចាស្ថិតនៅក្នុង «ដំណាក់កាលចុងក្រោយ» នោះ​ ក្រោយមកបានព្រមានថា ឱកាសសម្រាប់ការទូត អាចនឹងអស់​យ៉ាងឆាប់រហ័ស។ លោក Trump បានប្រាប់អ្នកសារ​ព័ត៌មាននៅមូលដ្ឋានរួម Andrews ជិតទីក្រុងវ៉ាស៊ីនតោនថា «វាស្ថិតនៅលើខ្សែ​បន្ទាត់​ហើយ ពោលគឺ​អាចមាន​កិច្ចព្រមព្រៀង​ ឬសង្គ្រាមថ្មី​ សូម​ជឿចុះ។ ប្រសិនបើយើងមិនទទួលបានចម្លើយដ៏​ត្រឹមត្រូវទេនោះ​ វានឹងមាន​ភាព​តាន​តឹង​យ៉ាងលឿនរហ័ស។ យើងទាំងអស់គ្នាត្រៀមខ្លួនរួចរាល់ហើយ»។

គួរ​បញ្ជាក់ថា បទឈប់បាញ់នៅថ្ងៃទី៨ ខែមេសា បានបញ្ឈប់ការប្រយុទ្ធគ្នាដោយបើកចំហ រវាងអ៊ីរ៉ង់ និងសហរដ្ឋអាមេរិក និងអ៊ីស្រាអែល ប៉ុន្តែសង្គ្រាមពាក្យសម្ដី បានជំនួសឲ្យ​​ការវាយប្រហារ​គ្នា​ទៅវិញ​ទៅមក​ នៅ​សមរភូមិ។ លោក Trump បានគំរាមកំហែងម្តងហើយម្តងទៀត អំពីវិធានការ​យោធាថ្មី​ ខណៈដែលមន្ត្រីអ៊ីរ៉ង់ បានឆ្លើយតបជាមួយនឹងការព្រមានកាន់តែខ្លាំងឡើងៗរបស់ពួកគេ៕