ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍នៅថ្ងៃព្រហស្បតិ៍នេះថា ប្រធានាធិបតី Masoud Pezeshkian និងរដ្ឋមន្ត្រីក្រសួងមហាផ្ទៃប៉ាគីស្ថាន លោក Mohsin Naqvi បានពិនិត្យឡើងវិញនូវការវិវត្តក្នុងតំបន់ និងបានពិភាក្សាអំពីទស្សនវិស័យនៃការចរចារវាងសហរដ្ឋអាមេរិក និងទីក្រុងតេអេរ៉ង់ ស្របពេលលោកប្រធានាធិបតី ដូណាល់ ត្រាំ បានព្រមានថា ទីក្រុងវ៉ាស៊ីនតោនអាចនឹងបន្តសង្គ្រាម «យ៉ាងឆាប់រហ័ស» ប្រសិនបើមិនទទួលបានចម្លើយត្រឹមត្រូវចំពោះសំណើរបស់ខ្លួននោះទេ។

អ៊ីរ៉ង់បាននិយាយនៅថ្ងៃព្រហស្បតិ៍នេះថា ខ្លួនកំពុងពិនិត្យឡើងវិញនូវជំហរចុងក្រោយរបស់ទីក្រុងវ៉ាស៊ីនតោនលើការបញ្ចប់សង្គ្រាមរវាងសហរដ្ឋអាមេរិក និងទីក្រុងតេអេរ៉ង់ ដែលបានចាប់ផ្តើមនៅថ្ងៃទី ០៨ ខែកុម្ភៈ ហើយត្រូវបានផ្អាកក្រោមបទឈប់បាញ់ ចាប់តាំងពីថ្ងៃទី០៨ ខែមេសា បន្ទាប់ពីប្រធានាធិបតីអាមេរិក ដូណាល់ ត្រាំ បានណែនាំថា លោកត្រៀមខ្លួនរង់ចាំ ប៉ុន្តែបានព្រមានអំពីការវាយប្រហារឡើងវិញ ប្រសិនបើអ៊ីរ៉ង់មិនយល់ព្រមលើកិច្ចព្រមព្រៀង។

ប៉ាគីស្ថានបានដាក់ខ្លួនជាអ្នកសម្របសម្រួលដ៏សំខាន់មួយ ចាប់តាំងពីសង្គ្រាមបានផ្ទុះឡើង បន្ទាប់ពីការវាយប្រហាររួមគ្នារបស់សហរដ្ឋអាមេរិក និងអ៊ីស្រាអែលលើទីក្រុងតេអេរ៉ង់ នៅចុងខែកុម្ភៈ ដែលបង្កឲ្យ មានការសងសឹក និងការរំខានរបស់អ៊ីរ៉ង់នៅក្នុងច្រកសមុទ្រហ័រមូស ជាច្រករបៀងថាមពលសកលដ៏សំខាន់មួយដែលប្រេង និងឧស្ម័នប្រហែលមួយភាគប្រាំរបស់ពិភពលោកឆ្លងកាត់។

លោក Naqvi បានមកដល់ទីក្រុងតេអេរ៉ង់កាលពីថ្ងៃពុធ ហើយបានជួបពិភាក្សាជាមួយប្រធានាធិបតីអ៊ីរ៉ង់ លោក Masoud Pezeshkian និងមន្ត្រីជាន់ខ្ពស់ដទៃទៀត ខណៈដែលទីក្រុងអ៊ីស្លាម៉ាបាដ ដែលជាម្ចាស់ផ្ទះនៃកិច្ចចរចាផ្ទាល់ដ៏កម្រជុំទី១ រវាងសហរដ្ឋអាមេរិក និងអ៊ីរ៉ង់ បានបង្កើនកិច្ចខិតខំប្រឹងប្រែងផ្នែកការទូត ដើម្បីសម្របសម្រួលសន្តិភាព ចំពេលមានភាពតានតឹងឡើងវិញរវាងភាគីទាំងពីរ៕