ក្រសួងការបរទេសចិនបានឲ្យ​ដឹង​ថា នាយករដ្ឋមន្ត្រីប៉ាគីស្ថាន លោក Shehbaz Sharif នឹងបំពេញទស្សនកិច្ច នៅទីក្រុងប៉េកាំង ចាប់ពីថ្ងៃទី ២៣ ដល់ថ្ងៃទី២៦ ខែឧសភា ឆ្នាំ២០២៦ នេះ​ ដើម្បីពិភាក្សាពី​បញ្ហា​នានា​ តែ​មិនបានបញ្ជាក់នោះឡើយ​ថា តើ​សង្គ្រាមនៅអ៊ីរ៉ង់នឹងត្រូវបានលើក​យក​មក​ជជែក​ដែរ ឬយ៉ាងណា​។

ប្រទេស​ប៉ាគីស្ថាន និងចិន បានស្វែងរកការសម្របសម្រួល ក្នុងជម្លោះ នៅតំបន់​មជ្ឈិមបូព៌ា ដែលបង្កឡើងដោយការវាយប្រហាររបស់សហរដ្ឋអាមេរិក និងអ៊ីស្រាអែល។ កិច្ចព្រមព្រៀងមាន​បទឈប់បាញ់ ចាប់តាំងពីថ្ងៃទី៨ ខែមេសា បានបញ្ឈប់អរិភាព ប៉ុន្តែប្រធានាធិបតីអាមេរិក លោក Donald Trump បានព្រមានកាលពី​ថ្ងៃទី២០​ ខែឧសភាថា ឱកាសសម្រាប់ការទូតកំពុងអស់​បណ្ដើរៗ​ហើយ​។

នៅថ្ងៃព្រហស្បតិ៍ (ទី២១ ខែឧសភា) នេះ អ្នកនាំពាក្យក្រសួងចិន លោក Guo Jiakun បានប្រាប់សន្និសីទសារព័ត៌មានមួយ​ថា៖ «មេដឹកនាំចិន និងប៉ាគីស្ថាន នឹងមានការផ្លាស់ប្តូរទស្សនៈស៊ីជម្រៅ លើទំនាក់ទំនងទ្វេភាគី និងបញ្ហាដែលជាកង្វល់រួម»។

លោក Guo បានបន្ថែមថា ប្រទេសចិននឹងធ្វើការជាមួយប៉ាគីស្ថាន ដើម្បី «ធ្វើការរួមចំណែកជាវិជ្ជមានដល់ការស្តារឡើង​វិញនូវ​សន្តិភាព និងស្ថិរភាព នៅមជ្ឈិមបូព៌ា»។

គួរបញ្ជាក់​ថា ក្នុងរយៈពេល ២សប្តាហ៍កន្លងមកនេះ ទីក្រុងប៉េកាំងបាន​ធ្វើជាម្ចាស់​ស្វាគមន៍​​ដំណើរទស្សនកិច្ចរបស់​ប្រធានាធិប​អាមេរិក​ លោក Donald Trump និងមេដឹកនាំ​រុស្ស៊ី លោក Vladimir Putin៕