​

ប្រទេស​រុស្ស៊ីបានបញ្ជាក់​នៅ​ថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) នេះ​ថា ខ្លួននឹងផ្តល់ការគាំទ្រយ៉ាងសកម្មដល់គុយបា ទោះបីជាមានការប៉ុនប៉ងដោយ​សហរដ្ឋអាមេរិក ក្នុងការសម្លុត​កំហែង​ និងដាក់​សម្ពាធ​កាន់តែ​ខ្លាំង​ឡើងៗ លើ​កោះដែលគ្រប់គ្រងដោយលទ្ធិ​កុម្មុយនីស្តក៏ដោយ។

សហរដ្ឋអាមេរិកបានប្រកាសពីការចោទប្រកាន់ពីបទឃាតកម្ម ប្រឆាំងនឹងអតីតប្រធានាធិបតី លោក​ Raul Castro កាលពីថ្ងៃពុធ ដែលជាការបង្កើន​យ៉ាងខ្លាំង នៅក្នុងយុទ្ធនាការរបស់ទីក្រុងវ៉ាស៊ីនតោន ប្រឆាំងនឹងគុយបា ជាកន្លែងដែលក្រុម​កុម្មុយនីស្តរបស់លោក Castro បានកាន់តំណែង ចាប់តាំងពីបងប្រុសរបស់លោក គឺលោក Fidel Castro បានដឹកនាំបដិវត្តន៍ក្នុងឆ្នាំ១៩៥៩​។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់អ្នកសារព័ត៌មានថា៖ «យើងនឹងបន្តផ្តល់ការគាំទ្រយ៉ាងសកម្មបំផុតដល់ប្រជាជនគុយបាជាបងប្អូន ក្នុងអំឡុងពេលវេលា​ដ៏លំបាកបំផុតនេះ»។

លោកស្រី​បាន​បន្ថែម​៖ «យើងសូម​បញ្ជាក់ជាថ្មីនូវសាមគ្គីភាពពេញលេញរបស់យើងជាមួយគុយបា និងថ្កោលទោសយ៉ាងខ្លាំង ចំពោះការប៉ុនប៉ងជ្រៀតជ្រែកយ៉ាងធ្ងន់ធ្ងរ នៅក្នុងកិច្ចការផ្ទៃក្នុងរបស់រដ្ឋអធិបតេយ្យ ការបំភិតបំភ័យ ហើយ​និងការប្រើប្រាស់វិធានការរឹតត្បិតជា​ឯកតោភាគីដោយ​ខុសច្បាប់ ការគំរាមកំហែង និងការសម្លុត​រក​ប្រយោជន៍​»។

យ៉ាង​ណាក្ដី លោកស្រី Zakharova មិនបានផ្តល់សេចក្ដី​លម្អិត អំពីការគាំទ្រដែលរុស្ស៊ីនឹងផ្តល់ឲ្យ​គុយ​បានោះទេ​៕