សហរដ្ឋអាមេរិក និងអ៊ីរ៉ង់ បានប្រកាន់ជំហរផ្ទុយគ្នាកាលពី​​ថ្ងៃព្រហស្បតិ៍ ​​២១​​ ឧសភា​ សប្ដាហ៍នេះ​ ​លើស្តុកអ៊ុយរ៉ានី​ញ៉ូមរបស់ទីក្រុងតេអេរ៉ង់ និងការគ្រប់គ្រងនៅលើច្រកសមុទ្រហ័រមូស ទោះបីជារដ្ឋមន្ត្រីការបរទេសអាមេរិក លោក Marco Rubio បាននិយាយថាមានសញ្ញាល្អមួយចំនួននៅក្នុងការចរចាក៏ដោយ។ ​

ប្រធានាធិបតីអាមេរិក លោក Donald Trump ​បាននិយាយថា សហរដ្ឋអាមេរិកនឹងយកមកវិញនូវស្តុកអ៊ុយរ៉ានី​ញ៉ូម​​ត្រូវបាន​ចម្រាញ់​​រួច​របស់អ៊ីរ៉ង់ ដែលទីក្រុងវ៉ាស៊ីនតោនជឿថាត្រូវបានកំណត់ជោគវាសនា​​​​សម្រាប់អាវុធនុយក្លេអ៊ែរ ទោះបីជាទីក្រុងតេអេរ៉ង់ ​និយាយថា​សារធាតុ​ទាំង​នោះ​ ​ត្រូវបានបម្រុងទុកសម្រាប់គោលបំណងសន្តិភាពសុទ្ធសាធក៏ដោយ។​

លោក Trump ​​​បានប្រាប់ក្រុម​អ្នកសារ​​ព័ត៌មាននៅសេតវិមានថា ពួកលោក​​​​នឹងទទួលបានសារធាតុទាំង​នោះ​។ ពួកលោក​​មិនត្រូវការសារធាតុនោះទេ ពួកលោក​​មិនចង់បានទេ។ពួកលោក​​ប្រហែលជានឹងបំផ្លាញចោល​​ បន្ទាប់ពី​យក​បាន​​​​ ប៉ុន្តែពួកលោក​​នឹងមិនបណ្ដោយ​​​​​ឱ្យពួកគេមាន​ឡើយ​។​​​​​​​​ ​​​​

លោក Rubio បានប្រាប់ក្រុម​អ្នកសារ​​ព័ត៌មានថា ដំណោះស្រាយការទូតនឹងមិនអាចអនុវត្តបានទេ ប្រសិនបើទីក្រុងតេអេរ៉ង់អនុវត្តប្រព័ន្ធគិតថ្លៃនៅច្រកសមុទ្រហ័រមូស។ ទោះ​យ៉ាងណា​ លោកបានបន្ថែមថា មានវឌ្ឍនភាពមួយចំនួននៅក្នុងការចរចា។

លោក Rubio បាននិយាយថា មានសញ្ញាល្អមួយចំនួន។ លោក​​មិនចង់មានសុទិដ្ឋិនិយមខ្លាំងពេកទេ ​ ដូច្នេះ មាន​តែ​​រង់ចាំមើលថាមានអ្វីកើតឡើងក្នុងរយៈពេលប៉ុន្មានថ្ងៃខាងមុខ។

ប្រភពព័ត៌មានជាន់ខ្ពស់របស់អ៊ីរ៉ង់បានប្រាប់សារព័ត៌មាន Reuters កាលពីថ្ងៃព្រហស្បតិ៍ សប្ដាហ៍នេះថា​ ​​ពុំ​​ទាន់មានកិច្ចព្រមព្រៀងណាមួយត្រូវបានសម្រេចនៅឡើយទេ ប៉ុន្តែគម្លាតត្រូវបានបង្រួម ដោយបន្ថែមថា ការចម្រាញ់​​សារធាតុអ៊ុយរ៉ានី​ញ៉ូមរបស់អ៊ីរ៉ង់ និងការគ្រប់គ្រងរបស់ទីក្រុងតេអេរ៉ង់លើច្រកសមុទ្រហ័រមូស នៅតែជាចំណុចជាប់គាំង៕