រុស្ស៊ីបានបាញ់មីស៊ីលមានសមត្ថភាពបំពាក់នុយក្លេអ៊ែរ និងបានបញ្ចេញគ្រាប់នុយក្លេអ៊ែរទៅឲ្យអង្គភាពមួយចំនួនកាលពីថ្ងៃព្រហស្បតិ៍ ទី២១ ខែឧសភា ជាផ្នែកមួយនៃសមយុទ្ធនុយក្លេអ៊ែរទ្រង់ទ្រាយធំ ក្នុងពេលមានភាពតានតឹងកាន់តែខ្លាំងឡើងជាមួយសម្ព័ន្ធយោធាណាតូ ជុំវិញសង្គ្រាមនៅអ៊ុយក្រែន និងសកម្មភាពយានដ្រូននៅក្នុងតំបន់បាល់ទិក។

រុស្ស៊ី កំពុងធ្វើសមយុទ្ធនុយក្លេអ៊ែរធំបំផុតមួយចំនួនក្នុងរយៈពេលជាច្រើនឆ្នាំមកនេះ ដែលមានអ្នកចូលរួម ៦៤.០០០នាក់ ដើម្បីហ្វឹកហាត់កងកម្លាំងរបស់ខ្លួនក្នុងការត្រៀម និងប្រើប្រាស់កងកម្លាំងនុយក្លេអ៊ែរក្នុងករណីមានការឈ្លានពាន។

ប្រធានាធិបតីរុស្ស៊ី លោក Vladimir Putin បានប្រាប់ប្រធានាធិបតីប្រទេសបេឡារុស លោក Alexander Lukashenko រដ្ឋមន្ត្រីក្រសួងការពារជាតិរុស្ស៊ី លោក Andrei Belousov និងឧត្តមសេនីយ៍ជាន់ខ្ពស់ថា ការប្រើប្រាស់អាវុធបែបនេះនឹងតែងតែជាវិធានការពិសេស និងខ្លាំងបំផុតនៃជម្រើសចុងក្រោយ។ លោក Putin បាននិយាយនៅក្នុងវិមានក្រឹមឡាំងថា «ដោយមានភាពតានតឹងកាន់តែខ្លាំងនៅក្នុងពិភពលោក និងការលេចចេញនូវការគំរាមកំហែងនិងហានិភ័យថ្មី ការប្រើប្រាស់នុយក្លេអ៊ែរទាំងបីវិស័យមានលើគោក លើទឹក និងលើអាកាសរបស់យើង ត្រូវតែបន្តបម្រើជាអ្នកធានាដែលអាចទុកចិត្តបាននៃដែនអធិបតេយ្យភាពនៃរដ្ឋសហភាពរុស្ស៊ី និងប្រទេសបេឡារុស។ លោកបាននិយាយបន្ថែមថា ខណៈរុស្ស៊ីមិនចង់ពាក់ព័ន្ធក្នុងការប្រកួតប្រជែងសព្វាវុធ ប្រទេសនេះនឹងអភិវឌ្ឍកងកម្លាំងនុយក្លេអ៊ែររបស់ខ្លួន និងរក្សាពួកគេឱ្យនៅក្នុងកម្រិតគ្រប់គ្រាន់ រួមទាំងមីស៊ីល និងនាវាមុជទឹកថ្មីៗផងដែរ។ រុស្ស៊ី មានឃ្លាំងអាវុធនុយក្លេអ៊ែរធំបំផុតរបស់ពិភពលោក មានក្បាលគ្រាប់នុយក្លេអ៊ែរប្រហែល ៤.៤០០គ្រាប់ត្រូវបានដាក់ពង្រាយនិងស្តុកទុក ខណៈសហរដ្ឋអាមេរិកមានប្រហែល ៣.៧០០គ្រាប់ នេះបើយោងតាមសហព័ន្ធអ្នកវិទ្យាសាស្ត្រអាមេរិក។ ប្រទេសចិន គឺជាមហាអំណាចនុយក្លេអ៊ែរធំបំផុតទីបីរបស់ពិភពលោក មានប្រហែល ៦២០គ្រាប់ បន្ទាប់មកគឺប្រទេសបារាំងមាន ២៩០គ្រាប់ និងអង់គ្លេសមានប្រហែល២២៥គ្រាប់ នេះបើយោងតាមសហព័ន្ធ។