ប្រភពព័ត៌មានជាន់ខ្ពស់ពីររូបរបស់អ៊ីរ៉ង់បាននិយាយ មេដឹកនាំកំពូលអ៊ីរ៉ង់បានចេញសេចក្តីណែនាំមួយថា សារធាតុ​អ៊ុយរ៉ានីញ៉ូមក​ម្រិតជិតដល់ការផលិត​អាវុធរបស់ប្រទេសនេះ ត្រូវតែ​​នៅក្នុង​កណ្ដាប់ដៃ​​​អ៊ីរ៉ង់​ ​ហើយ​​មិនគួរត្រូវបានបញ្ជូនទៅក្រៅប្រទេសឡើយ​ ដោយបានពង្រឹងជំហររបស់ទីក្រុងតេអេរ៉ង់លើការទាមទារចម្បងមួយរបស់សហរដ្ឋអាមេរិកក្នុងកិច្ចចរចាសន្តិភាព។​​​ ​​​​​​​​​​ ​​

បទបញ្ជារបស់មេដឹកនាំ​កំពូល​​លោក​ Ayatollah Mojtaba Khamenei អាចធ្វើឱ្យប្រធានាធិបតីអាមេរិក Donald Trump ខកចិត្តបន្ថែមទៀត និងធ្វើឱ្យស្មុគស្មាញដល់កិច្ចចរចាលើការបញ្ចប់សង្គ្រាមអាមេរិក-អ៊ីស្រាអែលលើអ៊ីរ៉ង់។  

លោក Trump បានសន្យា​កាលពីថ្ងៃព្រហស្បតិ៍ថា សហរដ្ឋអាមេរិកនឹងមិនអនុញ្ញាតឱ្យអ៊ីរ៉ង់មានឃ្លាំងស្តុកអ៊ុយរ៉ានីញ៉ូម ដែ​លចម្រាញ់រួចក្នុង​កម្រិត​​ខ្ពស់របស់ខ្លួនឡើយ។​​

លោក Trump បានប្រាប់ក្រុមអ្នកសារ​​ព័ត៌មាននៅសេតវិមានថា សហរដ្ឋអាមេរិក​នឹង​មិន​អនុញ្ញាត​ឲ្យ​អ៊ីរ៉ង់​មានគ្រាប់បែក​នុយក្លេអ៊ែរ​ជាដាច់ខាត​។

ក្រុម​មន្ត្រីអ៊ីស្រាអែលបានប្រាប់សារព័ត៌មាន​​ Reuters ថា លោក Trump បានធានាដល់អ៊ីស្រាអែលថា ឃ្លាំងស្តុកអ៊ុយរ៉ានី​​ញ៉ូម​ចម្រាញ់រួចរបស់អ៊ីរ៉ង់ ដែលត្រូវការដើម្បីផលិត​អាវុធបរមាណូ នឹងត្រូវបានបញ្ជូនចេញពីអ៊ីរ៉ង់ ហើយកិច្ចព្រមព្រៀងសន្តិភាពណាមួយត្រូវតែរួមបញ្ចូលចំណុច​នេះ។

អ៊ីស្រាអែល សហរដ្ឋអាមេរិក និងរដ្ឋលោកខាងលិចដទៃទៀត បានចោទប្រកាន់អ៊ីរ៉ង់ជាយូរមកហើយថា កំពុងស្វែងរកអាវុធនុយក្លេអ៊ែរ រួមទាំងការចង្អុលបង្ហាញពីសកម្មភាព​របស់ខ្លួនក្នុងការចម្រាញ់​សារធាតុអ៊ុយរ៉ានីញ៉ូមឲ្យ​​ដល់កម្រិត​​​ ៦០% ដែលខ្ពស់ជាងតម្រូវការសម្រាប់ការប្រើប្រាស់ស៊ីវិល និងជិតដល់៩០​​​% ដែលត្រូវការសម្រាប់ក្រាប់បែក​នុយក្លេអ៊ែរ​។ អ៊ីរ៉ង់បដិសេធដែល​ថា ខ្លួនកំពុងស្វែងរកអាវុធនុយក្លេអ៊ែរ៕