ការិយាល័យស៊ើបអង្កេតជាតិហ្វីលីពីន NBI បាននិយាយកាលពីថ្ងៃព្រហស្បតិ៍ ​​២១​​ ឧសភា ​សប្ដាហ៍នេះ​ ថា ស្ថាប័ន​​នេះ​ នឹង​​​​ចាប់ខ្លួនអ្នកនយោបាយជាន់ខ្ពស់​មួយរូប​​ដែលតុលាការឧក្រិដ្ឋកម្មអន្តរជាតិ ICC តាមរកមុខ​​​​​ ដោយមិនបង្អង់យូរ មួយថ្ងៃបន្ទាប់ពីតុលាការបានបដិសេធញត្តិរបស់លោក​​ ​ដែលស្វែងរកការរារាំងការចាប់ខ្លួនលោក​​។​​​

រដ្ឋមន្ត្រីក្រសួងយុត្តិធម៌កាលពីថ្ងៃព្រហស្បតិ៍នោះដែរ ​បានផ្តល់ភ្លើងខៀវដល់ភ្នាក់ងារអនុវត្តច្បាប់ឱ្យចាប់ខ្លួនសមាជិកព្រឹទ្ធសភា លោក Ronald dela Rosa​ អតីតស្នងការ​នគរបាល​​ដែលត្រូវបានចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិក្នុងតួនាទីរបស់លោក​​ជាមន្ត្រី​អនុវត្តកំពូលនៃ «សង្គ្រាមប្រឆាំងគ្រឿងញៀន» របស់អតីតប្រធានាធិបតី លោក​ Rodrigo Duterte។​

លោក Melvin Matibag ប្រធានការិយាល័យស៊ើបអង្កេតជាតិហ្វីលីពីន បាននិយាយថាសមាជិកព្រឹទ្ធសភាដែល​​បាន​រត់គេចខ្លួនលោក​ Dela Rosa នឹងត្រូវចាប់ខ្លួនមិនថាបុគ្គលនោះ​ ពេញ​ចិត្តឬអត់នោះទេ ព្រោះពួកលោក​ត្រូវអនុវត្តច្បាប់ដោយគ្មានការភ័យខ្លាច ឬការបំពេញ​​ចិត្ត។

លោក Duterte វ័យ​​៨១​ ឆ្នាំ កាន់តំណែង​ជាប្រធានាធិបតីពីឆ្នាំ២០១៦ ដល់​​​ ២០២២​ ​កំពុងជាប់ឃុំនៅទីក្រុងឡាអេ បន្ទាប់ពីការចាប់ខ្លួនកាលពីឆ្នាំមុន ហើយនឹងត្រូវបញ្ជូនទៅជំនុំជម្រះទោស​ ដោយចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិ។ លោក​​នៅតែ​​​អះអាង​​​ថា រូបលោក​គ្មានទោស​​ឡើយ​។

លោកRosa បានវិលត្រឡប់មកវិញ​ដ៏​​គួរឱ្យភ្ញាក់ផ្អើលកាលពីសប្តាហ៍មុន បន្ទាប់ពីការពួនសំងំ​លាក់​​ខ្លួនរយៈពេលប្រាំមួយខែ ហើយបានទៅជ្រកកោននៅព្រឹទ្ធសភា មុនពេលរត់គេចខ្លួននៅព្រឹកថ្ងៃទី១៤​​ ខែឧសភា ប៉ុន្មានម៉ោងបន្ទាប់ពីភាពវឹកវរ និងការបាញ់ប្រហារបានផ្ទុះឡើង ក្រោយ​​ការអំពាវនាវរកជំនួយ ដោយអះអាងថា ការចាប់ខ្លួនលោកនឹងកើតឡើងឆាប់ៗ​។



រដ្ឋមន្ត្រីក្រសួងយុត្តិធម៌ លោក Fredderick Vida កាលពីថ្ងៃព្រហស្បតិ៍ បាននិយាយថា អាជ្ញាធរមានតម្រុយអំពីទីតាំងរបស់លោក Dela Rosa ប៉ុន្តែពុំ​​​​បានបញ្ជាក់លម្អិតទេ។ មេធាវីរបស់សមាជិកព្រឹទ្ធសភារូបនេះ ​បាននិយាយថា លោកកំពុងស្ថិតនៅក្នុង​ប្រទេសហ្វីលីពីននៅឡើយ​ទេ​​​៕