ការបើកមជ្ឈមណ្ឌលការទូតដ៏ធំរបស់សហរដ្ឋអាមេរិកនៅដែនដី Greenland កាលពីថ្ងៃព្រហស្បតិ៍ ទី២១ ខែឧសភា ត្រូវបានក្រុមបាតុករចេញប្រឆាំងទៅនឹងមហិច្ឆតារបស់ប្រធានាធិបតី លោក Donald Trump សម្រាប់ឥទ្ធិពលកាន់តែខ្លាំងនៅលើកោះមហសមុទ្រអាកទិកមួយនេះ ខណៈរដ្ឋមន្ត្រីរដ្ឋាភិបាលក្នុងតំបន់បានគេចចេញពីព្រឹត្តិការណ៍នេះ។

ដោយផ្លាស់ប្តូរពីបន្ទប់ឈើមួយកន្លែងនៅជាយក្រុង Nuuk ទៅកាន់ការិយាល័យនៅទីក្រុងដែលធំជាងនេះ ស្ថានកុងស៊ុលថ្មីរបស់សហរដ្ឋអាមេរិកបានក្លាយជាចំណុចកណ្តាលមួយសម្រាប់ប្រជាជនដែនដី Greenland ដែលមិនពេញចិត្តចំពោះបំណងរបស់លោក Trump ក្នុងការគ្រប់គ្រងកោះនេះ ជាផ្នែកពាក់កណ្តាលស្វយ័តរបស់ប្រទេសដាណឺម៉ាក។

នាយករដ្ឋមន្ត្រីដែនដី Greenland លោក Jens-Frederik Nielsen និងអ្នកនយោបាយមួយចំនួនទៀតបាននិយាយថា ពួកគេបដិសេធការអញ្ជើញឱ្យចូលរួមក្នុងពិធីបើកបេសកកម្មការទូតថ្មីនេះ។ មនុស្សរាប់រយនាក់ បានធ្វើបាតុកម្មនៅជិតស្ថានកុងស៊ុល ដោយកាន់ទង់ជាតិក្រហមនិងស និងផ្ទាំងរូបភាពដែលសរសេរថា «សហរដ្ឋអាមេរិក និងពាក្យថា បញ្ឈប់វាទៅ» និងស្រែកថា «ទេ…….ដែនដី Greenland ជារបស់ប្រជាជន Greenland»។

អ្នកនាំពាក្យក្រសួងការបរទេសអាមេរិកបាននិយាយថា ទីតាំងថ្មីនេះមានសមត្ថភាពធំជាងមុន និងផ្តល់កន្លែងដ៏ល្អសម្រាប់ការចូលរួមផ្នែកការទូតរបស់សហរដ្ឋអាមេរិកនៅដែនដី Greenland។ កាលពីខែមករា សេតវិមានបាននិយាយថា លោក Trump កំពុងពិចារណាពីរបៀបដើម្បីទទួលបានដែនដីកោះ Greenland រួមទាំងការប្រើប្រាស់យោធាអាមេរិក ដែលបង្កឱ្យមានការភ្ញាក់ផ្អើលក្នុងចំណោមសម្ព័ន្ធមិត្តណាតូនៅអឺរ៉ុប។