លោកប្រធានាធិបតី ដូណាល់ ត្រាំ ( Donald Trump) កាលពីថ្ងៃព្រហស្បតិ៍ បាននិយាយថា សហរដ្ឋអាមេរិក នឹងបញ្ជូនកងទ័ពបន្ថែមចំនួន ៥.000 នាក់ ទៅកាន់ប្រទេសប៉ូឡូញ ដែលបង្កឲ្យមានការភាន់ច្រឡំបន្ទាប់ពីសេចក្តីថ្លែងការណ៍ផ្លាស់ប្តូរជាច្រើនសប្តាហ៍ពីលោក ត្រាំ និងរដ្ឋបាលរបស់លោកអំពីការកាត់បន្ថយ គឺមិនមែនបង្កើនវត្តមានយោធាអាមេរិកនៅអឺរ៉ុបនោះទេ។

រដ្ឋបាលលោក ត្រាំ បាននិយាយថា ខ្លួនកំពុងកាត់បន្ថយទ័ពនៅអឺរ៉ុបប្រហែល ៥.000នាក់ ហើយមន្ត្រីអាមេរិក បានបញ្ជាក់ថា សមាជិកយោធាប្រហែល ៤.000 នាក់ លែងដាក់ពង្រាយទៅកាន់ប្រទេសប៉ូឡូញទៀតហើយ។ ការប្រកាសនៅលើប្រព័ន្ធផ្សព្វផ្សាយសង្គមរបស់លោក ត្រាំ បង្កើនភាពមិនប្រាកដប្រជាកាន់តែច្រើនសម្រាប់សម្ព័ន្ធមិត្តអឺរ៉ុបដែលត្រូវបានបិទបាំងដោយការផ្លាស់ប្តូរ ខណៈដែលរដ្ឋបាលនេះ បានត្អូញត្អែរអំពីសមាជិកណាតូដែលមិនបានទទួលខុសត្រូវគ្រប់គ្រាន់ចំពោះបន្ទុកការពារជាតិរបស់ពួកគេ និងបរាជ័យក្នុងការធ្វើអ្វីៗបន្ថែមទៀត ដើម្បីគាំទ្រសង្គ្រាមអ៊ីរ៉ង់។

លោក ត្រាំ បាននិយាយនៅលើប្រព័ន្ធផ្សព្វផ្សាយសង្គម Truth Social ថា៖«ដោយផ្អែកលើការបោះឆ្នោតដោយជោគជ័យរបស់ប្រធានាធិបតីប៉ូឡូញបច្ចុប្បន្ន លោក Karol Nawrocki ដែលខ្ញុំមានមោទនភាពក្នុងការគាំទ្រ និងទំនាក់ទំនងរបស់យើងជាមួយលោក ខ្ញុំមានសេចក្តីសោមនស្សរីករាយ ក្នុងការប្រកាសថា សហរដ្ឋអាមេរិក នឹងបញ្ជូនកងទ័ពបន្ថែមចំនួន ៥.000នាក់ ទៅកាន់ប្រទេសប៉ូឡូញ»។

លោក ត្រាំ និងមន្ទីរបញ្ចកោណបាននិយាយក្នុងរយៈពេលប៉ុន្មានសប្តាហ៍ថ្មីៗនេះថា ពួកគេកំពុងដកកងទ័ពយ៉ាងហោចណាស់ ៥.០០០នាក់ ចេញពីប្រទេសអាល្លឺម៉ង់ បន្ទាប់ពីលោកអធិការបតី Friedrich Merz បាននិយាយថា សហរដ្ឋអាមេរិក កំពុងត្រូវបានថ្នាក់ដឹកនាំអ៊ីរ៉ង់ធ្វើឲ្យ «អាម៉ាស់» ហើយបានរិះគន់អ្វីដែលលោកហៅថា ខ្វះយុទ្ធសាស្ត្រក្នុងការធ្វើសង្គ្រាមនេះ៕