លោក​ប្រធានាធិបតី Donald Trump កាលពីថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) បាន​សន្យាថា នៅទី​បំផុត​ សហរដ្ឋអាមេរិកនឹងយកស្ដុក​សារធាតុ​អ៊ុយរ៉ានី​ញ៉ូមចម្រាញ់​ហើយ​កម្រិត​ខ្ពស់​របស់អ៊ីរ៉ង់ បើ​ទោះបីជាទី​ក្រុង​តេអេរ៉ង់ និយាយ​​ថា ខ្លួននឹងមិនព្រម​ប្រគល់ឲ្យ​ក៏ដោយ។

លោក Trump បានប្រាប់អ្នកសារ​ព័ត៌មាននៅសេតវិមានថា៖ «យើងនឹងយក​វា (អ៊ុយរ៉ានីញ៉ូម) បាន​។ យើងមិនត្រូវការវាទេ យើងមិនចង់បានវាទេ។ យើងប្រហែលជានឹងបំផ្លាញវាចោលបន្ទាប់ពីយើងយក​វាបាន​ ប៉ុន្តែយើងនឹងមិនបណ្ដោយ​ឲ្យ​ពួកគេមានវាទេ»។

សាធារណរដ្ឋ​ឥស្លាម​ត្រូវបានគេជឿថា មានសារធាតុ​អ៊ុយរ៉ានី​ញ៉ូមកម្រិត​ខ្ពស់​ប្រហែល ៩០០ផោន (ជាង ៤០០គីឡូក្រាម) ដែលលោក Trump និយាយថា ត្រូវបានកប់ដោយសារការវាយប្រហារតាមអាកាសរបស់សហរដ្ឋអាមេរិក និងអ៊ីស្រាអែល កាលពីជិត ១ឆ្នាំមុន។

ការទាញ​យក​សារធាតុ​នេះ គឺជាផ្នែកមួយនៃគោលបំណងដ៏​សំខាន់​របស់លោក Trump ក្នុងសង្គ្រាមរបស់លោក លើអ៊ីរ៉ង់ ដែលទីក្រុងតេអេរ៉ង់ នឹងមិនត្រូវបានអនុញ្ញាតឲ្យ​ផលិតអាវុធនុយក្លេអ៊ែរឡើយ។ យ៉ាង​ណាក្ដី​ ប្រភពជាន់ខ្ពស់​អ៊ីរ៉ង់ ២រូប បានប្រាប់សារព័ត៌មាន​ Reuters ថា​ មេដឹកនាំកំពូលរបស់អ៊ីរ៉ង់ លោក Mojtaba Khamenei បានចេញសេចក្តីណែនាំថា សារធាតុ​អ៊ុយរ៉ានី​ញ៉ូមកម្រិតជិតផលិត​អាវុធបាន​របស់ប្រទេស មិនគួរត្រូវបានបញ្ជូនទៅបរទេសនោះទេ​។

នៅ​ថ្ងៃព្រហស្បតិ៍នោះដែរ រដ្ឋមន្ត្រីការបរទេសអាមេរិក លោក Marco Rubio បានបង្ហាញ​ក្តីសង្ឃឹមថា ដំណើរទស្សនកិច្ចរបស់ប្រមុខកងទ័ពប៉ាគីស្ថានទៅកាន់ប្រទេសអ៊ីរ៉ង់ នឹងជួយ​ជំរុញដំណើរការ​ការទូត ស្ដី​ពី​ការបញ្ចប់សង្គ្រាម ដោយនិយាយថា វឌ្ឍនភាពកំពុង​កើតមាន៕