ឯកអគ្គរដ្ឋទូតជប៉ុន ប្រចាំប្រទេសចិន លោក Kenji Kanasugi បានសន្យាប្រឹងប្រែងឲ្យ​អស់ពីសមត្ថភាព ដើម្បីរៀបចំកិច្ចប្រជុំ រវាងលោកស្រីនាយករដ្ឋមន្ត្រី Sanae Takaichi និងប្រធានាធិបតីចិន លោក Xi Jinping នៅឯ​កិច្ចប្រជុំកំពូល APEC (កិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក) ក្នុងខែវិច្ឆិកា ដើម្បីធ្វើ​ឲ្យ​មាន​ភាព​ប្រសើរ​ឡើង​ ក្នុង​ទំនាក់ទំនងទ្វេភាគី ដែលបានឈានដល់កម្រិតទាបបំផុតជា​លើក​ដំបូង ក្នុងរយៈពេលជាច្រើនឆ្នាំ។

នៅក្នុងបទសម្ភាសន៍ជាមួយសារព័ត៌មាន​ Kyodo News កាល​ពី​ថ្ងៃទី២០​ ខែឧសភា បេសកជនរូបនេះបាននិយាយថា កិច្ចប្រជុំរវាង​មេដឹកនាំទាំង២ គឺ «មានសារៈសំខាន់ខ្លាំងណាស់» ក្នុង​ការ​ទម្លាយភាព​ទាល់​ច្រក ​សម្រាប់ការផ្សះ​ផ្សារ​ចំណងមិត្តភាព ដោយបន្ថែមថា «សាររបស់មេដឹកនាំទាំង២ (ពីកិច្ចប្រជុំ) អាចទៅដល់មនុស្សគ្រប់គ្នា» និងជួយ «ជម្រះ​ឧបសគ្គផ្លូវចិត្ត»។

គួរ​បញ្ជាក់ថា ទំនាក់ទំនងចិន-ជប៉ុន បានធ្លាក់ចូល​ក្នុង​ភាព​អាប់អួអាក្រក់ទៅៗ​យ៉ាង​ឆាប់​រហ័ស ចាប់តាំងពីលោកស្រី Takaichi បានលើក​ឡើង​ក្នុងសុន្ទរកថា នៅ​សភាកាលពីខែវិច្ឆិកាឆ្នាំមុនថា ជប៉ុនអាចដាក់ពង្រាយកងកម្លាំងការពារជាតិរបស់ខ្លួន ក្នុងករណីមានជម្លោះ នៅ​កោះតៃវ៉ាន់ ជាកោះស្វ័យ​គ្រប់គ្រង ដែលទីក្រុងប៉េកាំងអះអាង​ថា ជាទឹក​ដី​របស់ខ្លួន​។

ដោយខឹងសម្បាយ៉ាងខ្លាំង ចំពោះការ​អត្ថាធិប្បាយរបស់លោកស្រី ប្រទេសចិនបានបង្កើនសម្ពាធលើជប៉ុន តាមរយៈការគ្រប់គ្រងការនាំចេញកាន់តែតឹងរ៉ឹង លើរបស់របរ​ប្រើ​បាន​ទាំង​ស៊ីវិល និង​យោធា ដែលអាចរួមបញ្ចូលទាំងរ៉ែកម្រ​ ការព្រមាន​ពលរដ្ឋកុំ​ឲ្យ​​ធ្វើដំណើរទៅ​ប្រទេសជិតខាង និងការលុបចោលព្រឹត្តិការណ៍វប្បធម៌ជប៉ុន ក្នុងចំណោមវិធានការផ្សេងៗទៀត។

ហើយ​ទោះបីជាលោកស្រី Takaichi បានបញ្ជាក់ថា ប្រទេសជប៉ុននៅតែបើកចំហ ចំពោះការសន្ទនាជាមួយចិនក៏ដោយ ក៏​លោក Kanasugi បានទទួលស្គាល់ថា ស្ថានភាពបច្ចុប្បន្ន គឺពិបាក ដោយសារទីក្រុងប៉េកាំងមិនទាន់បានឆ្លើយតបទៅនឹងសំណើរបស់លោកស្រីឡើយ​៕