ក្រសួងការបរទេសចិនបានឲ្យ​ដឹង​នៅថ្ងៃសុក្រ (ទី២២ ខែឧសភា ឆ្នាំ២០២៦) នេះថា រដ្ឋមន្ត្រីការបរទេសចិន លោក Wang Yi នឹងធ្វើដំណើរទៅកាន់ទីក្រុង New York និងធ្វើជាប្រធាន​ក្នុងកិច្ចប្រជុំកម្រិតខ្ពស់របស់ក្រុមប្រឹក្សាសន្តិសុខអង្គការសហប្រជាជាតិ (UNSC) នាថ្ងៃទី២៦ ខែឧសភា។

ដោយមិនបានផ្តល់ព័ត៌មានលម្អិតបន្ថែម ក្រសួង​បាន​ឲ្យដឹង​នៅក្នុងសេចក្ដី​ថ្លែង​ការណ៍​ថា នៅទីក្រុង New York លោក Wang នឹងជួបជាមួយអគ្គលេខាធិការ UN លោក Antonio Guterres និងរដ្ឋមន្ត្រីការបរទេសមកពីប្រទេសដទៃទៀត។ ហើយ​អ្នកនាំពាក្យក្រសួង លោក Guo Jiakun បានប្រាប់សន្និសីទសារព័ត៌មាន​ប្រចាំថ្ងៃ​នៅទីក្រុងប៉េកាំងថា បន្ទាប់មក លោកនឹងបំពេញទស្សនកិច្ចនៅកាណាដា ចាប់ពីថ្ងៃទី២៨ ដល់ថ្ងៃទី៣០​ ខែឧសភា ដែលជាដំណើរទស្សនកិច្ចលើកដំបូងទៅកាន់ប្រទេសនេះ​ ដោយរដ្ឋមន្ត្រីការបរទេសចិនក្នុងរយៈពេល ១០​ឆ្នាំ។

លោក Guo បាននិយាយថា «ទំនាក់ទំនងចិន-កាណាដា បានផ្លាស់ប្តូរ និងបន្តល្អប្រសើរឡើង ហើយភាគីទាំង២ កំពុងធ្វើការ ដើម្បីកសាងភាពជាដៃគូយុទ្ធសាស្ត្រប្រភេទថ្មី»។ លោកបានបន្ថែមថា ទីក្រុងប៉េកាំងសង្ឃឹមថា ដំណើរទស្សនកិច្ចនេះនឹងបង្កើនទំនុកចិត្តនយោបាយ ពង្រីកកិច្ចសហប្រតិបត្តិការដែលផ្តល់ផលប្រយោជន៍ឲ្យ​គ្នា​ទៅវិញទៅមក ដោះស្រាយ​ការ​ខ្វែង​គំនិត​គ្នា និងរក្សាទំនាក់ទំនងទ្វេភាគីឲ្យ​នៅលើស្ថាន​ភាព​ល្អ​ ស្ថិរភាព និងប្រកបដោយចីរភាព។

ដំណើរទស្សនកិច្ចរបស់លោក Wang ទៅកាន់ទីក្រុងញូវយ៉កនេះ​ គឺធ្វើឡើងបន្ទាប់ពីមាន​ជំនួប​កំពូល រវាងប្រធានាធិបតីអាមេរិក លោក Donald Trump និងប្រធានាធិបតីចិន លោក Xi Jinping កាលពីពាក់កណ្តាលខែឧសភា ដែលមានការផ្លាស់ប្តូរដ៏កក់ក្តៅ ប៉ុន្តែមិនបានផ្តល់លទ្ធផលវិជ្ជមានដ៏សំខាន់ណាមួយ ស្ដីពី​ពាណិជ្ជកម្ម ឬជម្លោះអ៊ីរ៉ង់ឡើយ​។ ទីក្រុងប៉េកាំង បានឲ្យដឹង​ថា លោក Xi ត្រូវបានគេរំពឹងថា នឹងធ្វើទស្សនកិច្ចផ្លូវរដ្ឋទៅកាន់សហរដ្ឋអាមេរិក នៅរដូវស្លឹកឈើជ្រុះ៕