ប្រធានាធិបតីអាមេរិក លោក Donald Trump បានបង្ក​ឲ្យមាន​ការ​​ភ្ញាក់ផ្អើលដល់​សម្ព័ន្ធមិត្តក្នុង​អង្គការ​ណាតូ (NATO) ដោយសន្យាថា នឹងបញ្ជូនកងទ័ពបន្ថែមចំនួន ៥.០០០នាក់ ទៅកាន់ប្រទេសប៉ូឡូញ ពោល​គឺ​ត្រឹមតែប៉ុន្មានម៉ោងប៉ុណ្ណោះ មុនពេលដែលរដ្ឋមន្ត្រីការបរទេស លោក Marco Rubio ជួបជាមួយរដ្ឋមន្ត្រីសម្ព័ន្ធមិត្ត នៅស៊ុយអែត នា​ថ្ងៃសុក្រ (ទី២២ ខែឧសភា ឆ្នាំ២០២៦) នេះ​ ក្នុង​អំឡុង​ពេលមានការបែកបាក់យ៉ាងខ្លាំង​ ជុំវិញសង្គ្រាមអ៊ីរ៉ង់។

នៅក្នុងការបង្ហោះលើ​បណ្ដាញសង្គម Truth Social លោក Trump បានលើកឡើងពីទំនាក់ទំនងរបស់លោកជាមួយប្រធានាធិបតីជាតិនិយមអភិរក្សនិយមរបស់ប៉ូឡូញ គឺលោក Karol Nawrocki ជាហេតុផលនៅពីក្រោយការសម្រេចចិត្តរបស់លោក ក្នុងការបញ្ជូនកងទ័ពបន្ថែម។

លោក Trump បានបញ្ជាក់​នៅក្នុងការបង្ហោះនោះ​ថា៖ «ដោយផ្អែកលើភាព​ជោគ​ជ័យ​នៅក្នុង​ការបោះឆ្នោត​របស់ប្រធានាធិប​តី​ប៉ូឡូញ​នាពេល​នេះ គឺ​លោក Karol Nawrocki ដែលខ្ញុំគាំទ្រ​ដោយ​​មោទនភាព និង​ដែលខ្ញុំ​​​មានមោទនភាព​ក្នុង​ការ​បង្កើត​​ទំនាក់ទំនងរបស់យើងជាមួយគាត់ ខ្ញុំមានសេចក្តីរីករាយក្នុងការប្រកាសឲ្យ​ដឹង​ថា សហរដ្ឋអាមេរិកនឹងបញ្ជូនកងទ័ពបន្ថែមចំនួន ៥.០០០នាក់ទៅកាន់ប្រទេសប៉ូឡូញ»។

នេះ​គឺជាការផ្លាស់ប្តូរដ៏គួរឲ្យ​ភ្ញាក់ផ្អើលមួយ ក្រោយ​រយៈពេលជាច្រើនសប្តាហ៍ដែលលោក Trump បានរិះគន់សមាជិកអង្គការ​ណាតូយ៉ាងខ្លាំង​ ក្នុង​ការមិនធ្វើអ្វីបន្ថែមទៀត ដើម្បីជួយដល់​យុទ្ធនាការយោធា រវាងសហរដ្ឋអាមេរិក និងអ៊ីស្រាអែល។ លោកបាននិយាយថា លោកកំពុងពិចារណាដកខ្លួនចេញពីសម្ព័ន្ធមិត្តនេះ​ ហើយបានចោទសួរ​ថា តើទីក្រុងវ៉ាស៊ីនតោនត្រូវមាន​កាតព្វកិច្ច​​​គោរពកតិកាសញ្ញាការពារជាតិទៅវិញទៅមកដែរ ឬទេ។

មុនពេលចាកចេញទៅចូល​រួម​កិច្ចប្រជុំរដ្ឋមន្ត្រីការបរទេសរបស់​អង្គការ​ណាតូ នៅទីក្រុង Helsingborg ប្រទេសស៊ុយអែត លោក Rubio បាននិយាយថា លោក Trump មានការខកចិត្តយ៉ាងខ្លាំង ចំពោះសមាជិកសម្ព័ន្ធមិត្តដែលមិនបានអនុញ្ញាតឲ្យ​សហរដ្ឋអាមេរិកប្រើប្រាស់មូលដ្ឋានទ័ព នៅលើទឹកដីរបស់ពួកគេសម្រាប់សង្គ្រាមនេះ​ ដោយបានចង្អុលបង្ហាញជាពិសេសទៅអេស្ប៉ាញ៕