អគ្គលេខាធិការអង្គការ​ណាតូ (NATO) លោក Mark Rutte បាននិយាយនៅ​ថ្ងៃសុក្រ (ទី២២ ខែឧសភា ឆ្នាំ២០២៦) នេះ​ថា សម្ព័ន្ធភាពកំពុងស្ថិត​នៅ​លើផ្លូវ​ដ៏រឹងមាំជាងមុន នៅពេល​ដែល​បាន​​កាត់បន្ថយការពឹងផ្អែកលើសម្ព័ន្ធមិត្តតែមួយបន្តិចម្តងៗ ខណៈរដ្ឋមន្ត្រីការបរទេសបានជួប​ជុំ​គ្នា សម្រាប់កិច្ចប្រជុំកំពូល នៅប្រទេសស៊ុយអែត។

លោក Rutte បានប្រាប់អ្នក​សារ​ព័ត៌មានមុនកិច្ចប្រជុំថា៖ «គន្លង​ផ្លូវ​ដែលយើងកំពុងឆ្ពោះ​ទៅ​ ​ជាទិសដៅ​​​ដែល​មាន​នូវ​តំបន់​អឺរ៉ុបកាន់តែរឹងមាំ និងអង្គការ​ណាតូកាន់តែរឹងមាំ ដោយ​ធ្វើឲ្យ​ប្រាកដថា យើងបន្តបន្តិចម្តងៗ នឹង​សូវ​ពឹងផ្អែកលើសម្ព័ន្ធមិត្តតែមួយ ដូចដែលយើងមាន​ជាយូរមកហើយ»។

លោក Rutte បានបន្ត​ថា ការផ្លាស់ប្តូរនេះនឹងផ្តល់ឲ្យ​សហរដ្ឋអាមេរិកនូវពេល​វេលា​កាន់តែច្រើនជាង​មុន ដើម្បីផ្តោតលើអាទិភាពផ្សេងទៀត ខណៈដែលសម្ព័ន្ធមិត្តអឺរ៉ុប បង្កើនការចំណាយលើវិស័យ​ការការពារជាតិ​។

លោកបានបន្ថែមថា៖ «នេះគឺចាំបាច់ មិនត្រឹមតែ ដើម្បីធ្វើឲ្យ​មាន​ភាព​ស្មើគ្នានូវអ្វីដែលអ្នកកំពុងចំណាយជាមួយសហរដ្ឋអាមេរិកប៉ុណ្ណោះទេ ប៉ុន្តែថែមទាំងធ្វើឲ្យ​ប្រាកដថា យើងមាននូវ​អ្វីដែលយើងត្រូវការ ដើម្បីកំណត់ការ​ការពារ ប្រឆាំងនឹងសត្រូវរបស់យើង»។

ជាមួយ​គ្នានេះ ប្រមុខអង្គការ​ណាតូរូប​នេះ ក៏បានគូសបញ្ជាក់ផង​ដែរ​ថា សហរដ្ឋអាមេរិកនឹងបន្តដើរតួនាទីយ៉ាងសំខាន់ នៅក្នុង​តំបន់អឺរ៉ុប ទាំងក្នុងវិស័យការពារអាវុធ​នុយក្លេអ៊ែរ និងធម្មតា​ ខណៈពេលដែលអឺរ៉ុបទទួលខុសត្រូវកាន់តែច្រើនជាង​មុន​។

គួរបញ្ជាក់ថា ការកត់សម្គាល់របស់លោកនេះ បានកើតឡើងក្នុង​ពេលមានការរិះគន់ថ្មីៗរបស់សហរដ្ឋអាមេរិក ចំពោះសមាជិកមួយចំនួនរបស់​សម្ព័ន្ធមិត្ត ដែលមិនអនុញ្ញាតឲ្យ​ប្រើប្រាស់​មូលដ្ឋានទ័ពរបស់ពួកគេ ក្នុងអំឡុងពេល​មាន​សង្គ្រាមជាមួយ​អ៊ីរ៉ង់៕