ខណៈពេលដែលប៉ាគីស្ថានបន្តកិច្ចប្រឹងប្រែងរបស់ខ្លួន ដើម្បីនាំ​ទស្សនៈ​ឲ្យកាន់តែកៀកគ្នា​ និងបង្រួមគម្លាត រវាងអ៊ីរ៉ង់ និងសហរដ្ឋអាមេរិក រដ្ឋមន្ត្រីក្រសួងមហាផ្ទៃប៉ាគីស្ថាន លោក Mohsin Naqvi បានជួបជាមួយរដ្ឋមន្ត្រីការបរទេសអ៊ីរ៉ង់ លោក Abbas Araghchi ជាថ្មី​ម្តងទៀត នៅទីក្រុងតេអេរ៉ង់។

ប្រព័ន្ធផ្សព្វផ្សាយអ៊ីរ៉ង់បានរាយការណ៍នៅថ្ងៃសុក្រ (ទី២២ ខែឧសភា ឆ្នាំ​២០២៦) នេះ​ថា ជំនួបនេះបានពិភាក្សាអំពីវិធី ដើម្បីពិនិត្យមើលសំណើដែលមានគោលបំណងដោះស្រាយការខ្វែងគំនិត​គ្នា រវាងភាគីអ៊ីរ៉ង់ និងអាមេរិក ពោល​គឺ​ ២ថ្ងៃបន្ទាប់ពីលោក Naqvi បានផ្ញើសារចុងក្រោយបង្អស់​របស់សហរដ្ឋអាមេរិកទៅកាន់អ៊ីរ៉ង់។

កិច្ចប្រជុំនេះបានកើតឡើង ខណៈដែលមេបញ្ជាការកងទ័ពប៉ាគីស្ថាន លោក Asim Munir ត្រូវបានគេរំពឹងថា នឹងទៅទស្សនកិច្ច​​នៅ​ទីក្រុងតេអេរ៉ង់ នៅ​​ថ្ងៃព្រហស្បតិ៍ ប្រសិនបើមាន​ការ​ទម្លាយ​ភាព​ទាល់ច្រក​ដែលមិនទាន់បានកើតឡើងនៅឡើយទេ។

វាក៏បានកើតឡើងផងដែរ នៅពេលដែលប្រភពបានបញ្ជាក់ទៅកាន់ប្រព័ន្ធ​ផ្សព្វផ្សាយ​ Al Arabiya ថា ជម្លោះ រវាងភាគីទាំង២ នៅតែផ្តោតលើបញ្ហានៃការផ្ទេរសារធាតុ​អ៊ុយរ៉ានី​ញ៉ូមចម្រាញ់ហើយ​កម្រិត​ខ្ពស់​ ចេញពីអ៊ីរ៉ង់ និងការគ្រប់គ្រងលើច្រកសមុទ្រ Hormuz។

សហរដ្ឋអាមេរិកបានទទូចមិន​ទួល​យក​ការរៀបចំណាមួយដែលនឹងរក្សាសារធាតុ​អ៊ុយរ៉ានី​ញ៉ូម នៅ​ខាង​ក្នុងប្រទេសអ៊ីរ៉ង់ ឬអនុញ្ញាតឲ្យ​ទីក្រុងតេអេរ៉ង់ដាក់ការគ្រប់គ្រងណាមួយលើច្រក​សមុទ្រ​ Hormuz ដែល១ភាគ៥ នៃការដឹកជញ្ជូនប្រេង និងឧស្ម័នសកលឆ្លងកាត់តាម​រយៈ​នោះ​៕