ការវាយប្រហាររបស់អ៊ីស្រាអែលនៅទូទាំងភាគខាងត្បូងប្រទេសលីបង់ ចាប់ពីថ្ងៃព្រហស្បតិ៍ដល់ថ្ងៃសុក្របានសម្លាប់មនុស្សយ៉ាងហោចណាស់ ១១ នាក់ ក្នុងនោះមានគ្រូពេទ្យសង្គ្រោះបឋម អ្នកជួយសង្គ្រោះ និងកុមារម្នាក់ និងរបួសជាច្រើននាក់ទៀត។ នេះបើយោងតាមប្រភពព័ត៌មានលីបង់។

នៅព្រឹកព្រលឹមថ្ងៃសុក្រ គ្រូពេទ្យសង្គ្រោះបឋមចំនួន ៤នាក់ ត្រូវបានសម្លាប់ នៅក្នុងការវាយប្រហារមួយលើមជ្ឈមណ្ឌលសង្គ្រោះបន្ទាន់មួយ នៅក្នុងទីក្រុង Hanouiyeh ក្នុងស្រុក Tyre។ នេះបើយោងតាមរបាយការណ៍របស់ទីភ្នាក់ងារសារព័ត៌មានជាតិលីបង់។

នាល្ងាចថ្ងៃសុក្រ ការវាយប្រហារតាមអាកាសលើចំណុចប្រសព្វ Deir Qanoun al-Nahr-Abbasiyeh ក្នុងស្រុក Tyre បានសម្លាប់មនុស្ស ៦នាក់ ក្នុងនោះមានគ្រូពេទ្យសង្គ្រោះបឋមពីរនាក់មកពីសមាគមកាយរឹទ្ធិឥស្លាម Risala ដែលកំពុងជម្លៀសជនរងគ្រោះពីការវាយប្រហារមុននេះ។ អ្នកស្លាប់ក៏រួមមានពលរដ្ឋលីបង់ម្នាក់ និងជនជាតិស៊ីរីបីនាក់ ហើយម្នាក់ជាកុមារ។

នៅក្នុងទីក្រុង Nabatieh ការវាយប្រហារដោយយានដ្រូនដែលកំណត់គោលដៅរថយន្តភីកអាប់មួយគ្រឿង បានសម្លាប់មនុស្សម្នាក់ និងរបួសពីរនាក់ផ្សេងទៀត។ នេះបើយោងតាមរបាយការណ៍ក្នុងស្រុក៕