មន្ត្រីបាននិយាយថា យ៉ាងហោចណាស់មនុស្ស ១៧នាក់ បានស្លាប់ និង ១០នាក់ រងរបួស នៅក្នុងគ្រោះថ្នាក់ចរាចរណ៍មួយ នៅភាគពាយ័ព្យប្រទេសប៉ាគីស្ថាន នាថ្ងៃចន្ទនេះ។

គ្រោះថ្នាក់នេះ បានកើតឡើង នៅពេលដែលរថយន្តក្រុងដឹកអ្នកដំណើរមួយគ្រឿងដែលធ្វើដំណើរពីស្រុក Swat ទៅកាន់ស្រុក Khyber ក្នុងខេត្ត Pakhtunkhwa បានជួបប្រទះបញ្ហាម៉ាស៊ីនដំណើរការខុសប្រក្រតីហើយបានឈប់នៅចិញ្ចើមផ្លូវ។

អ្នកដំណើរបានចុះពីរថយន្តក្រុង ហើយកំពុងរង់ចាំនៅក្បែរនោះ នៅពេលដែលរថយន្តដឹកទំនិញមួយគ្រឿង បានបាត់បង់ការគ្រប់គ្រង ហើយបានបុកចូលទៅក្នុងហ្វូងមនុស្ស និងរថយន្តក្រុងដែលចតនៅស្ងៀមនោះ។

លោក Bilal Ahmad Faizi ជាមន្ត្រីជួយសង្គ្រោះ បានប្រាប់សារព័ត៌មាន AFP ថា៖«យ៉ាងហោចណាស់មនុស្ស ១៧ នាក់ បានស្លាប់ និង ជាង ១០នាក់ រងរបួស» ដោយបន្ថែមថា អ្នករងរបួសបីនាក់ គឺស្ថិតក្នុងស្ថានភាពធ្ងន់ធ្ងរ។

លោក Muhammad Ali ជាវេជ្ជបណ្ឌិតនៅមន្ទីរពេទ្យក្នុងស្រុកដែលទទួលជនរងគ្រោះ ក៏បានបញ្ជាក់ពីចំនួនអ្នកស្លាប់នោះផងដែរ៕