លោក Marco Rubio រដ្ឋមន្ត្រីការបរទេសអាមេរិក បានលើកឡើង​នៅ​ថ្ងៃអង្គារ​​២៦​​ឧសភា សប្ដាហ៍នេះ ​បន្ទាប់ពីទីក្រុងមូស្គូបានបើកការវាយប្រហារដ៏ធំមួយលើទីក្រុងគី​វ ថា សហរដ្ឋអាមេរិក នៅតែមានឆន្ទៈសម្របសម្រួលក្នុងសង្គ្រាមរវាងរុស្ស៊ី និងអ៊ុយក្រែន។

លោក Rubio បាននិយាយបន្ទាប់ពី​​ជំនួ​​បតាមទូរស័ព្ទជាមួយរដ្ឋមន្ត្រីការបរទេសរុស្ស៊ី លោក ​Sergei Lavrov ថា រាល់ពេលដែលអ្នកមើល​​ឃើញការវាយប្រហារធំៗទាំងនេះពីភាគី​ម្ខាង ឬម្ខាងទៀត ធ្វើឲ្យគេ​​នឹងកឃើញពីមូលហេតុ​នាំ​ឲ្យមាន​​​​សង្គ្រាមដ៏គួរឱ្យភ័យខ្លាចនេះ ដែលឥឡូវនេះបានអូសបន្លាយយូរជាងសង្គ្រាមលោកលើកទីពីរទៅទៀត​ ហើយវាត្រូវតែបញ្ចប់។

លោកបានប្រាប់ក្រុមអ្នកសារព័ត៌មានក្នុងអំឡុងពេលទស្សនកិច្ចផ្លូវការទៅកាន់ប្រទេសឥណ្ឌាថា សហរដ្ឋអាមេរិកត្រៀមខ្លួនជាស្រេច និងត្រៀមខ្លួនជួយធ្វើអ្វីគ្រប់យ៉ាងដែលពួកលោក​អាចធ្វើបាន ដើម្បីជួយសម្រួលដល់ការបញ្ចប់សង្គ្រាមនេះ ហើយសង្ឃឹមថាឱកាសនឹងលេចឡើងនៅចំណុចណាមួយ។

ជាអ្វីដែលខ្លួនហៅថាជាការសងសឹកប្រឆាំងនឹងការវាយប្រហារ​លើ​​តំបន់​​កាន់កាប់ដោយ​ទីក្រុង​មូស្គូ​​ក្នុងប្រទេស​​អ៊ុយក្រែន​ រុស្ស៊ីបានចាប់ផ្តើមការវាយប្រហារតាមអាកាសដ៏ធំបំផុតមួយរបស់ខ្លួនទៅលើទីក្រុងគី​​វ ដោយបានវាយប្រហាររដ្ឋធានីនេះ​​​ជាមួយនឹង​យានដ្រូន​ប្រហែល ៦០០ គ្រឿង និងមីស៊ីល ៩០ គ្រាប់ពេញមួយយប់រហូតដល់ថ្ងៃអាទិត្យ។ អភិបាលក្រុងគី​វ លោក Vitali Klitschko បាននិយាយថា ការខូចខាតត្រូវបានកត់ត្រានៅគ្រប់សង្កាត់ទាំងអស់នៃទីក្រុងនេះ​។ ទីតាំងដែលវាយប្រហាររួមមាន រោងចក្រផ្គត់ផ្គង់ទឹក ផ្សារ លំ​​​នៅឋាន ​​សាលារៀនជាច្រើន សារមន្ទីរសិល្បៈជាតិអ៊ុយក្រែន និងអគារក្រសួងការបរទេស ដែលបានរងការខូចខាតជាលើកដំបូងចាប់តាំងពីសង្គ្រាមលោកលើកទី ២។រុស្ស៊ីបានវាយប្រហារអ៊ុយក្រែនពីរដងដោយមីស៊ីល Oreshnik​ មានសមត្ថភាព​បំពាក់ក្បាលគ្រាប់​នុយក្លេអ៊ែរ​​ ជាមីស៊ីលដែលប្រធានាធិបតីរុស្ស៊ី Vladimir Putin បានអួតថាមិ​នអាចស្ទាក់ចាប់បានដោយសារតែល្បឿនរបស់វាលឿនជាងសំឡេងជាង១០ ដង៕