តម្លៃប្រេងបានកើនឡើងនៅថ្ងៃអង្គារ២៦ឧសភានេះ ហើយភាគហ៊ុនមានការឡើងចុះមិនទៀងទាត់ ខណៈសុទិដ្ឋិនិយមរបស់ក្រុមវិនិយោគិនលើកិច្ចព្រមព្រៀងសន្តិភាពរវាងសហរដ្ឋអាមេរិក និងអ៊ីរ៉ង់ដែលជិតមកដល់ត្រូវបានកាត់បន្ថយដោយការវាយប្រហារថ្មីរបស់អាមេរិកលើអ៊ីរ៉ង់។

មន្ត្រីមួយរូប បាននិយាយថា អ្នកចរចាជាន់ខ្ពស់របស់អ៊ីរ៉ង់ និងរដ្ឋមន្ត្រីការបរទេសរបស់ខ្លួន បានស្ថិតនៅទីក្រុងដូហា ដើម្បីពិភាក្សាជាមួយនាយករដ្ឋមន្ត្រីកាតាលើកិច្ចព្រមព្រៀងដែលអាចកើតមានជាមួយសហរដ្ឋអាមេរិក ដើម្បីបញ្ចប់សង្គ្រាម បន្ទាប់ពីទីក្រុងវ៉ាស៊ីនតោន និងទីក្រុងតេអេរ៉ង់បានបន្ទាបក្តីសង្ឃឹមសម្រាប់ការទម្លាយភាពទាល់ច្រកដែលជិតមកដល់។

ប៉ុន្តែទោះបីជាការចរចាបានបន្តក៏ដោយ កងកម្លាំងអាមេរិកបានបើកការវាយប្រហារកាលពីថ្ងៃចន្ទ ២៥ឧសភា ដើមសប្ដាហ៍នេះនៅភាគខាងត្បូងអ៊ីរ៉ង់ប្រឆាំងនឹងគោលដៅរួមទាំងទូកដែលព្យាយាមដាក់មីន និងទីតាំងបាញ់មីស៊ីល ដែលពួកគេបានហៅថាជាសកម្មភាពការពារខ្លួន។

ការវិវត្តន៍នេះបានធ្វើឱ្យតម្លៃប្រេងឆៅ Brent កើនឡើងជិត២% ឡើងដល់ ៩៧,៥៦ ដុល្លារក្នុងមួយបារ៉ែល ក្នុងវគ្គជួញដូរដំបូងនៅអាស៊ីនៅថ្ងៃអង្គារនេះ ហើយប្រេងឆៅ West Texas Intermediate របស់សហរដ្ឋអាមេរិកបានកើនឡើងបន្តិចបន្តួចពីតម្លៃជួញដូរចុងក្រោយកាលពីថ្ងៃចន្ទ ខណៈតម្លៃប្រាក់ដុល្លារអាមេរិកកើនឡើងនៅថ្ងៃអង្គារនេះ ។

តម្លៃទីផ្សារភាគហ៊ុនមានភាពចម្រុះ ដោយសន្ទស្សន៍ទូលំទូលាយបំផុតរបស់ MSCI នៃភាគហ៊ុនអាស៊ីប៉ាស៊ីហ្វិកនៅខាងក្រៅប្រទេសជប៉ុន (.MIAPJ0000PUS)បានបើកដោយកើនឡើង០,៨% ខណៈ Nikkei (.N225) របស់ប្រទេសជប៉ុន បានបើកការជួញដូរថ្មីដោយធ្លាក់ចុះ០,២។

តម្លៃភាគហ៊ុន Nasdaq កើនឡើង០,៩% ខណៈតម្លៃភាគហ៊ុន S&P 500 បានកើនឡើង០,៦៨ %។

តម្លៃភាគហ៊ុន EUROSTOXX 50 បានធ្លាក់ចុះ ០,៣៦ % ខណៈភាគហ៊ុន FTSE បានហក់ឡើង០,៤% ហើយភាគហ៊ុន DAX បានធ្លាក់ចុះ០,៤៣% ៕