កោះតៃវ៉ាន់ បានបញ្ជូននាវា និងយន្តហោះចម្បាំងទៅតាមដាន «ការល្បាតត្រៀមប្រយុទ្ធ» លើកទីពីររបស់ចិន ក្នុងរយៈពេលមួយសប្តាហ៍នៅជិតកោះនេះ ខណៈទីក្រុងតៃប៉ិ បានបង្កើនការការពាររបស់ខ្លួនលើសកម្មភាពរបស់ទីក្រុងប៉េកាំង។ ប្រទេសចិន បានដាក់សម្ពាធលើកោះតៃវ៉ាន់ ដោយបង្កើនវត្តមានយោធារបស់ខ្លួននៅជុំវិញកោះនេះ ហើយទីក្រុងតៃប៉ិ កំពុងស្ថិតក្នុងការប្រុងប្រយ័ត្នខ្ពស់ចំពោះសកម្មភាពបន្ថែមទៀតរបស់ចិន បន្ទាប់ពីប្រធានាធិបតី លោក ស៊ី ជីនពីង បានពិភាក្សាអំពីកោះតៃវ៉ាន់ ជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ នៅទីក្រុងប៉េកាំង ក្នុងខែនេះ។

ប្រទេសចិនបានចាត់ទុកកោះតៃវ៉ាន់ដែលគ្រប់គ្រងតាមបែបលទ្ធិប្រជាធិបតេយ្យថាជាដែនដីរបស់ខ្លួន ហើយធ្វើប្រតិបត្តិការនាវានិងយន្តហោះចម្បាំងរបស់ខ្លួននៅជុំវិញកោះនោះស្ទើរតែរាល់ថ្ងៃ។ អាជ្ញាធរកោះតៃវ៉ាន់ បានច្រានចោលការអះអាងសិទ្ធដែនអធិបតេយ្យភាពរបស់ទីក្រុងប៉េកាំង។ កាលពីយប់ថ្ងៃច័ន្ទ អាជ្ញាធរការពារជាតិកោះតៃវ៉ាន់បាននិយាយថា ខ្លួនបានប្រទះឃើញយន្តហោះចិនចំនួន ២១ គ្រឿង រួមទាំងយន្តហោះចម្បាំង J-16 និងយានដ្រូន កំពុងធ្វើប្រតិបត្តិការនៅជុំវិញកោះនេះ រួមជាមួយនាវាចម្បាំង កំពុងអនុវត្ត «ការល្បាតត្រៀមប្រយុទ្ធ»។ ប្រទេសចិនបានអនុវត្ត «ការល្បាតត្រៀមខ្លួន» ស្រដៀងគ្នានេះកាលពីថ្ងៃអង្គារកន្លងទៅ មួយថ្ងៃមុនពេលមេដឹកនាំកោះតៃវ៉ាន់លោក Lai Ching-te រៀបចំខួបលើកទីពីរក្នុងការចូលកាន់តំណែង។ ប្រទេសចិនមិនពេញចិត្តជាមួយលោក Lai ដែលបានចាត់ទុកថាជា «អ្នកផ្តាច់ខ្លួន» ហើយបានបដិសេធមិនទទួលយកសំណើសុំការចរចាពីលោកជាច្រើនលើក។

កាលពីចុងសប្តាហ៍ កោះតៃវ៉ាន់បាននិយាយថា ឆ្មាំល្បាតឆ្នេររបស់ខ្លួនបានប្រឈមមុខជាមួយនាវាឆ្មាំល្បាតឆ្នេររបស់ចិនមួយគ្រឿងនៅជិតកោះ Pratas គ្រប់គ្រងដោយកោះតៃវ៉ាន់ មានទីតាំងយុទ្ធសាស្ត្រនៅសមុទ្រចិនខាងត្បូង។