ស្នូកឃ័រ៖ កីឡាការិនីប៊ីយ៉ាស្នូកឃ័រការ៉ុមដ៏ឆ្នើមរបស់កម្ពុជា ស្រួង ភាវី បានបង្ហាញអារម្មណ៍សប្បាយរីករាយជាខ្លាំង ក្រោយបានចូលរួមពិធីបុណ្យចូលឆ្នាំថ្មី ប្រពៃណីជាតិខ្មែរ ដោយផ្ទាល់នៅស្រុកកំណើតបន្ទាប់ពីខ្លួនខកខានអស់ជិត ១០ឆ្នាំ។ មិនតែប៉ុណ្ណោះ លោកស្រីក៏រីករាយចំពោះការរៀបចំការប្រកួតកីឡាប៊ីយ៉ាស្នូកឃ័រការ៉ុមមិត្តភាពមួយ ដោយអញ្ជើញលោកស្រីចូលរួមដើម្បីអបអរសាទរដំណើរមកកាន់មាតុភូមិនេះផងដែរ។
ការលើកឡើងនេះបន្ទាប់ពីលោកស្រី ស្រួង ភាវី បានចូលរួមការប្រកួតមិត្តភាពនៅផ្សារទំនើបអ៊ីអនសែនសុខកាលពីល្ងាចថ្ងៃទី១៩ ខែមេសា ឆ្នាំ២០២២ ដែលរៀបចំដោយប្រជាជនកូរ៉េនៅកម្ពុជា និងមានការចូលរួមប្រកួតជាច្រើន ខណៈអ្នកឈ្នះក្រោយគេនឹងត្រូវប្រកួតវគ្គផ្ដាច់ព្រ័ត្រ ក្នុងន័យរឹតចំណងមិត្តភាពជាមួយកីឡាការិនីឆ្នើម ស្រួង ភាវី។ កីឡាការិនីមានដើមកំណើតពីខេត្តត្បូងឃ្មុំរូបនេះបន្ដថា ខ្លួនសប្បាយចិត្តដែលបានមកលេងស្រុកកំណើតក្នុងឱកាសបុណ្យចូលឆ្នាំថ្មី និងទទួលបានការអញ្ជើញចូលរួមប្រកួតមិត្តភាពនេះ។ លោកស្រីបានបង្ហាញមោទកភាពចំពោះខ្លួនឯងដែលត្រូវបានផ្ដល់តម្លៃ និងការគោរពស្រលាញ់ពីសំណាក់ប្រជាជនកូរ៉េ ក៏ដូចជាប្រជាជនកម្ពុជា មិនថាលោកស្រីរស់នៅប្រទេសកូរ៉េ ឬធ្វើដំណើរមកកម្ពុជានោះទេ។ លើសពីនេះតាមរយៈការប្រកួតមិត្តភាពនេះលោកស្រីក៏រំពឹងថា នឹងជំរុញវិស័យកីឡាប៊ីយ៉ាស្នូកឃ័រការ៉ុមនៅកម្ពុជាកាន់តែរីកចម្រើន នាថ្ងៃអនាគតផងដែរ។
សូមបញ្ជាក់ថា ស្រួង ភាវី បានទៅរស់នៅកូរ៉េជាមួយស្វាមីជាង ១០ឆ្នាំមកហើយ។ ដោយសារអាជីពកីឡាមួយនេះបានធ្វើឲ្យលោកស្រីមានកេរ្ដិ៍ឈ្មោះល្បីល្បាញជាខ្លាំងនៅសាធារណរដ្ឋកូរ៉េ និងកម្ពុជាក៏ដូចជាលើពិភពលោក បន្ទាប់ពីលោកស្រីដណ្ដើមបានជ័យលាភីជាច្រើនក្នុងការប្រកួតថ្នាក់ជាតិនៅកូរ៉េ និងការប្រកួតអន្ដរជាតិធំៗផ្សេងទៀតតំណាងប្រទេសកម្ពុជា។ មិនតែប៉ុណ្ណោះបច្ចុប្បន្នលោកស្រីក៏បានបើកក្លិបកីឡាស្នូកឃ័រការ៉ុមដ៏ធំមួយ នៅប្រទេសកូរ៉េទៀតផង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
