យោងតាមប្រភពព័ត៌មានបាននិយាយកាលពីថ្ងៃអង្គារ ទី២៦ ខែឧសភាថា យោធាអ៊ីស្រាអែល បានពង្រីកប្រតិបត្តិការតាមជើងគោករបស់ខ្លួននៅភាគខាងត្បូងប្រទេសលីបង់ហួសពីខ្សែបន្ទាត់កំណត់ព្រំដែនដែលអ៊ីស្រាអែលបានបង្កើតឡើងជាច្រើនគីឡូម៉ែត្រនៅក្នុងទឹកដីប្រទេសលីបង់ ក្រោយពីមានបទឈប់បាញ់ថ្ងៃទី១៦ ខែមេសា ជាមួយក្រុមហេសបូឡា។

ប្រភពមិនបានផ្តល់ព័ត៌មានលម្អិតបន្ថែមអំពីវិសាលភាពនៃការរុលចូលទៅមុខហួសពីអ្វីដែលហៅថា «ខ្សែបន្ទាត់លឿង» នោះទេ។ ខ្សែបន្ទាត់នេះ ដាច់ដោយឡែកពី «ខ្សែបន្ទាត់ខៀវ» ដែលកំណត់ដោយអង្គការសហប្រជាជាតិ កំណត់ព្រំដែនរវាងប្រទេសលីបង់ និងអ៊ីស្រាអែល បន្ទាប់ពីការដកទ័ពរបស់អ៊ីស្រាអែលក្នុងឆ្នាំ ២០០០ បង្កើតជាផ្នែកមួយនៃតំបន់ទ្រនាប់ដែលបានស្នើឡើង លាតសន្ធឹងពី៥គីឡូម៉ែត្រទៅ១០គីឡូម៉ែត្រ ចូលទៅក្នុងភាគខាងត្បូងប្រទេសលីបង់ ជាកន្លែងដែលកងទ័ពអ៊ីស្រាអែល បន្តធ្វើប្រតិបត្តិការនៅក្នុងភូមិរាប់សិបកន្លែងដែលភាគច្រើនត្រូវបានគេបោះបង់ចោល។ ចំណាត់ការនេះ ធ្វើឡើងក្នុងពេលមានអរិភាពឆ្លងកាត់ព្រំដែនកាន់តែខ្លាំងឡើង ទោះបីជាមានបទឈប់បាញ់ដែលបានប្រកាសកាលពីប៉ុន្មានសប្តាហ៍កន្លងទៅនេះក៏ដោយ។

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា អ៊ីស្រាអែលនឹងបង្កើនការវាយប្រហារប្រឆាំងក្រុមហេសបូឡា ខណៈមន្ត្រីអាមេរិកម្នាក់បាននិយាយថា ក្រុមដែលគាំទ្រដោយអ៊ីរ៉ង់ មិនអើពើទៅនឹងការព្រមានឱ្យបញ្ឈប់ការវាយប្រហារ ដែលនឹងធ្វើឱ្យអន្តរាយដល់ការចរចាដើម្បីបញ្ចប់សង្គ្រាមរវាងសហរដ្ឋអាមេរិក និងអ៊ីស្រាអែល លើអ៊ីរ៉ង់។ ក្រសួងសុខាភិបាលលីបង់និយាយថា ចំនួនអ្នកស្លាប់សរុបពីការវាយលុករបស់អ៊ីស្រាអែលចាប់តាំងពីថ្ងៃទី២ ខែមីនា បានកើនឡើងដល់៣.២១៣នាក់ និងរងរបួស៩.៧៣៧នាក់ គិតត្រឹមថ្ងៃទី២៦ ខែឧសភា។ អង្គការសុខភាពពិភពលោកនិយាយថា មនុស្សយ៉ាងហោចណាស់ ៦០៨ នាក់នៅក្នុងប្រទេសលីបង់ ត្រូវបានសម្លាប់នៅក្នុងការវាយប្រហាររបស់អ៊ីស្រាអែល ចាប់តាំងពីបទឈប់បាញ់។