ប្រជាជនក្នុងរដ្ឋធានីគីវ និងបណ្ដាស្ថានទូតបរទេសកំពុងព្រងើយកន្តើយចំពោះការគំរាមកំហែងពីទីក្រុងមូស្គូអំពីរលកនៃការវាយប្រហារយ៉ាងខ្លាំងលើរដ្ឋធានីអ៊ុយក្រែនដោយនិយាយថា មិនមែនជារឿងថ្មីទេបន្ទាប់ពីសង្គ្រាមជាច្រើនឆ្នាំ ដោយបង្ហាញពីទំនុកចិត្តយ៉ាងមុតមាំក្នុងការបន្តជីវិតរបស់ពួកគេ។

ប្រទេសរុស្ស៊ី ដែលបានវាយប្រហារទីក្រុងនានារបស់អ៊ុយក្រែនឥតឈប់ឈរ រួមទាំងរដ្ឋធានីគីវ ចាប់តាំងពីការចាប់ផ្តើមការវាយលុកទ្រង់ទ្រាយធំរបស់ខ្លួននៅឆ្នាំ ២០២២ បាននិយាយកាលពីថ្ងៃចន្ទ ដើមសប្ដាហ៍នេះថា ខ្លួនមានបំណងបើកការវាយប្រហារជាប្រព័ន្ធលើគោលដៅក្នុងរដ្ឋធានីគីវ និងបានជំរុញឱ្យជនបរទេស និងអ្នកការទូតចាកចេញ។រដ្ឋមន្ត្រីការបរទេសរុស្ស៊ី លោក Sergey Lavrov បានជំរុញឲ្យអាមេរិកជម្លៀសអ្នកការទូតចេញពីស្ថានទូតរបស់ខ្លួន នៅទីក្រុងគីវ ក្នុងអំឡុងការសន្ទនាតាមទូរស័ព្ទជាមួយរដ្ឋមន្ត្រីការបរទេសអាមេរិក លោក Marco Rubio កាលពីថ្ងៃចន្ទ។

ប៉ុន្តែទោះមានការទម្លាក់គ្រាប់បែកដ៏ខ្លាំងក្លាបំផុតមួយក្នុងចំណោមការទម្លាក់គ្រាប់បែកជាច្រើនក្នុងរដ្ឋធានីកាលពីពីរថ្ងៃមុនក៏ដោយ ប្រជាជនដែលត្រូវបានសម្ភាសន៍ដោយសារព័ត៌មាន Reuters បានសម្តែងការតាំងចិត្តរបស់ពួកគេ។លោក Oleksandr Korzh អតីតយុទ្ធជនវ័យ៤៣ ឆ្នាំ បាននិយាយថា លោកគិតថាការគំរាមកំហែងទាំងនោះគឺជាការរៀបចំក្នុងគោលបំណងសាបព្រោះការភ័យស្លន់ស្លោក្នុងចំណោមសាធារណជន។លោកថារូបលោកនឹងស្នាក់នៅក្នុងប្រទេសអ៊ុយក្រែន ហើយលោកក៏នឹងស្នាក់នៅក្នុងទីក្រុងគីវដែរ។

បេសកកម្មការទូតមួយចំនួននៅក្នុងរដ្ឋធានី ដែលប្រទេសរុស្ស៊ីបានជំរុញឱ្យចាកចេញឲ្យបានឆាប់ ពុំបានបង្ហាញពីគម្រោងចាកចេញឡើយ។ លោកស្រី Katarina Mathernova ឯកអគ្គរដ្ឋទូតសហភាពអឺរ៉ុបប្រចាំប្រទេសអ៊ុយក្រែន បានច្រានចោលការគំរាមកំហែងរបស់រុស្ស៊ី។

ហូឡង់ អាល្លឺម៉ង់ និងន័រវែស ស្ថិតក្នុងចំណោមប្រទេសដែលបានកោះហៅអ្នកការទូតរុស្ស៊ី ជុំវិញការវាយប្រហាររបស់ទីក្រុងមូស្គូលើរដ្ឋធានីអ៊ុយក្រែន និងការគំរាមកំហែងដល់បេសកជន៕