ប្រដាល់សកល៖ កីឡាករប្រដាល់សកលជម្រើសជាតិកម្ពុជា Eric Pieroun Pen មិនអាចចូលរួមប្រកួតកីឡាស៊ីហ្គេមលើកទី៣១ នៅវៀតណាមនាខែក្រោយបានឡើយដោយសារបញ្ហាលើសទម្ងន់។ ប៉ុន្ដែថ្នាក់ដឹកនាំសហព័ន្ធកីឡាប្រដាល់សកលកម្ពុជាបានលើកទឹកចិត្តដល់កីឡាករកូនកាត់ខ្មែរ-អាមេរិកឲ្យបន្ដខំប្រឹងដើម្បីត្រៀមការប្រកួតផ្សេងៗ តំណាងកម្ពុជា ពិសេសស៊ីហ្គេមឆ្នាំ២០២៣ ខាងមុខ។
លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជាបានបញ្ជាក់ថា ទម្ងន់ដើមដែល Eric Pen ត្រូវប្រកួតកន្លងមកគឺលើស ៩១គីឡូក្រាម តែម្ចាស់ផ្ទះវៀតណាមមិនបានចុះវិញ្ញាសាប្រកួតដល់ទម្ងន់នេះឡើយ។ តាមរយៈនេះសហព័ន្ធក៏បានស្នើឲ្យ Eric Pen ធ្វើការសម្រកគីឡូដែរ ហើយគេក៏បានធ្វើតាមសំណូមពរ តែដោយសារលើសទម្ងន់ច្រើនពេក គេមិនអាចសម្រកបានដល់ការកំណត់ឡើយ។ អគ្គលេខាធិការសហព័ន្ធដដែលបន្ដថា ទោះជាយ៉ាងនេះក្ដីក៏សហព័ន្ធនៅតែបន្ដពង្រឹងម្ចាស់ខ្សែក្រវាត់ WBA Asia រូបនេះដើម្បីត្រៀមការប្រកួតធំៗផ្សេងៗទៀត ដូចជាការប្រកួតកីឡាស៊ីហ្គេម ដែលជាការវាស់ស្ទង់ដ៏សំខាន់សម្រាប់ត្រៀមស៊ីហ្គេមឆ្នាំ២០២៣ នៅកម្ពុជា។ លោក ប៊ុយ សុភ័ណ្ឌ បានសម្ដែងការសោកស្ដាយជាខ្លាំង ចំពោះការខកខានចូលរួមប្រកួតស៊ីហ្គេមរបស់ជើងខ្លាំងប្រដាល់សកលកម្ពុជារូបនេះ ដ្បិត Eric Pen គឺជាក្ដីសង្ឃឹមខ្ពស់របស់សហព័ន្ធ ក្នុងដំណើរឆ្ពោះទៅដណ្ដើមមេដាយមាសជូនជាតិ។
តែយ៉ាងណានេះមិនមែនជាកំហុសរបស់ Eric Pen នោះទេ ហើយសហព័ន្ធក៏មិនបានដាក់បន្ទុកលើរូបគេដែរ ព្រោះវាមិនមែនជាប្រភេទទម្ងន់ដើមរបស់រូបគេឡើយ។ សូមបញ្ជាក់ថា ស៊ីហ្គេមលើកទី៣១ នៅវៀតណាមដែលពន្យាពេលមកពីចុងឆ្នាំ២០២១ នឹងចាប់ផ្ដើមការប្រកួតផ្លូវការពីថ្ងៃទី១២ ដល់ថ្ងៃទី២៣ ខែឧសភា ឆ្នាំ២០២២ ខាងមុខ ដោយម្ចាស់ផ្ទះបានកំណត់កីឡា ៤០ប្រភេទក្នុងព្រឹត្តិការណ៍ប្រចាំតំបន់នេះ ហើយកម្ពុជានឹងបញ្ជូនអត្តពលិក ៣៣ប្រភេទកីឡាចូលរួម ខណៈកីឡាប្រដាល់សកលនឹងបញ្ជូនកីឡាករ-កីឡាការិនី ៨រូបចូលរួម រួមមានកីឡាករ វី សុភ័ស, អុង ភារ៉ាក់, ហ៊ុន គឹមហ៊ាង, ទូច ដេវីត, សៅ រង្សី, នៅ សុខទី រួមជាមួយកីឡាការិនី នៅ ស្រីពៅ និងកីឡាការិនី វី ស្រីស្រស់៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
