យោងតាមសេវាសារព័ត៌មានអង្គការសហប្រជាជាតិ ​ លោក António Guterres អគ្គលេខាធិការអង្គការសហប្រជាជាតិ បានអំពាវនាវឱ្យមានការបន្ធូរបន្ថយជាបន្ទាន់នៃសង្គ្រាមនៅអ៊ុយក្រែន និងបានព្រមានអំពីស្ថានភាពកាន់តែធ្ងន់ធ្ងរ​ ដែលនឹងនាំឱ្យមានផលវិបាកមិនអាច​​​ប៉ាន់ស្មានបាន​។

ដូចដែលអគ្គលេខាធិការអង្គការសហប្រជាជាតិបានបញ្ជាក់ ភាពធ្ងន់ធ្ងរនៃស្ថានភាពត្រូវបានបង្ហាញដោយការវាយប្រហារដ៏ធំរបស់រុស្ស៊ីក្នុងរយៈពេលប៉ុន្មានថ្ងៃថ្មីៗនេះ ក៏ដូចជាការគំរាមកំហែងថ្មីៗក្នុងការវាយប្រហារអ៊ុយក្រែនជាប្រព័ន្ធ។

លោក Guterres បានរំលឹកថា ចាប់តាំងពីខែកុម្ភៈ ឆ្នាំ២០២២ មក ជនស៊ីវិលជាង ១៥.០០០នាក់ត្រូវបានសម្លាប់នៅក្នុងប្រទេសអ៊ុយក្រែន រួមទាំងកុមារជិត ៨០០នាក់។​​

លោកបានព្រមានថា ជម្លោះដែលកំពុងកើនឡើងនេះប្រឈមនឹងការហៀរចេញគ្រប់គ្រង​លែង​បាន​ ដោយលើកឡើងពីគ្រោះថ្នាក់នៃការគណនាខុស និងផលវិបាកដែលមិនដឹង​​​ និងមិនបានគ្រោងទុក។

កាលពីប៉ុន្មានថ្ងៃមុន អង្គភាពរុស្ស៊ីបានចាប់ផ្តើមគំរាមកំហែងវាយប្រហារជាប្រព័ន្ធប្រឆាំងនឹងអ៊ុយក្រែន និងទីក្រុងគី​​វជាពិសេស។ នៅទីក្រុងមូស្គូ ពួកគេនិយាយថា នេះជាការឆ្លើយតបទៅនឹងការវាយប្រហារដោយយានដ្រូ​​ន​ជាប្រចាំរបស់អ៊ុយក្រែនទៅលើរោងចក្រឧស្សាហកម្មប្រេងនៅក្នុងប្រទេសរុស្ស៊ី។

កាលពី​ចុងសប្ដាហ៍នេះ​​ប្រទេសរុស្ស៊ីបានធ្វើបច្ចុប្បន្នភាពចំនួនអ្នកស្លាប់ដោយសារយានដ្រូន​របស់អ៊ុយក្រែនទៅលើអន្តេវាសិកដ្ឋាន​និស្សិតមួយនៅក្នុងតំបន់ Luhansk ដែលជាទឹកដីក្រោមការគ្រប់គ្រងរបស់រុស្ស៊ីដល់២១ នាក់។ ការទម្លាក់គ្រាប់បែកនេះបានជំរុញឱ្យមានការវាយលុកផ្នែកការទូតយ៉ាងខ្លាំងដោយទីក្រុងមូស្គូ ដើម្បីទាមទារឱ្យអ៊ុយក្រែនឆ្លើយតបទៅសហគមន៍អន្តរជាតិ ទោះបីជាទីក្រុងគី​វបានបដិសេធការទទួលខុសត្រូវណាមួយនៅក្នុងហេតុការណ៍នេះក៏ដោយ៕